又到農曆年尾，係時候講呢啲。一七年香港大部分行業計，若唔轉工就平均加薪3至5%，跳槽嘅就人工平均多10至15%，國際專業人才招聘顧問公司華德士（Robert Walters）最新報告話嘅。
佢哋話銀行業好大機會凍人手，甚至再裁員，後勤尤其最高危，事關有啲銀行後勤中心近年全線遷去平啲嘅印度或菲律賓。連花紅一向高嘅投資銀行，佢哋後勤今年花紅亦好大機會不足1個月。
最渴市嘅係金融科技與網絡安全，「三個月請到一個人已經算好唔錯」，平均加薪10至20%；銀行法規、內部審計及風險管理人才仍搶手，呢類專才平均兩年轉一次工！
講開人工，香港寬頻（01310）CEO楊主光話，今年佢哋香港員工平均加薪4.5%，仲話佢哋福利待遇係全行最好：唔止女產假男有侍產假，每年入職月有一日入職周年假，仲有「買假送假」(請一日無薪假，公司送多日假畀你，上限五日變十日)。不過就咁，公司每年會炒5%表現唔達標嘅員工！
但香港寬頻宣布四合一服務計劃尋日凌晨十二點起由加248蚊加到288蚊，基本安裝費就由380蚊加到680蚊！唔知有幾多用嚟加薪呢可。