魚缸趣譚:大媽市話咁快玩完?

來又如風,離又如風,或世事通通不過是場夢……粉絲們唔好誤會,我並非陶醉於王菲的演唱會入面出唔番嚟,而只係抒發緊我對內地大媽於假期前後出入港股嗰種來無蹤、去無影的變化所產生那種嘆謂啫!

不是嗎?假期前的四個交易日,利用滬港通和深港通南下的淨投資金額分別是36億元(二十三日)、48億元(二十八日)、40億元(二十九日)同67億元(三十日)!

與其說北水撐起了港股,令恒指反彈收復了22,000點的關口來完成基金的年結,不如說瘋狂的大媽炒起咗隻建設銀行(00939),令它於期內吸引了過百億元,累升近一成的價位!

市場上,有好多人被這個行情迷住了,爭相去買建行正股甚至掃Call、買牛,直頭打算趁有北水到了,就奮不顧身地走出去裸泳!有的甚至連工商銀行(01398)同中國銀行(03988)都買埋,佢哋話喎:「追落後嘛。」

大戶角力 最好食花生

結果於節後返來,未知係咪中央限制內地人購匯買股所間接造成的陰霾所影響到呢?大市的成交得番500億元都唔夠,而南下淨買入的資金呢?就只有12億元咁大把!

假期前隻建行的一日成交明明有逾70億元,還超越埋騰訊控股(00700)咁盛況空前!因乜解究於假期後得番16億元咁陰功豬呢?

其實,我於上周四已經提醒過大家:該股於當日就錄得17.6億元的沽空金額,破咗過去十年來最高的單日紀錄。外資沽到爆,內資買到癲,一句講晒即係大撼大,我們旁觀的最好就係食花生,胡亂伸隻手進去呀,擦出的火花都會辣死人!

既然於假期前,工行同中行的表現都明顯唔入流喇,咁粉絲們於未來幾日就惟有繼續注視番隻建行的成交同大媽南下的狀況,話唔定恒指於北水行情正式消退咗之後衝20日線乏力,反彈就暫告一段落,然後再試低位喇!

富昌金融研究部總監 譚朗蔚(作者為註冊持牌人士)