吓？！騰訊控股（00700）微信今個農曆新年，打算唔再搞「搶紅包」！由一四年開始，微信每年農曆新年期間都同商戶合作，搞「搖一搖、搶紅包」活動，向微信用戶發出以億元人仔計嘅現金紅包。絲絲喺內地嘅Friend年年搶到癲，好似唔搶過唔覺過年咁。
不過，阿「微信之父」騰訊副總裁張小龍尋日話，微信產品定位本來係日常工具，唔應該有太多嘅節日營銷推廣活動，佢哋兩年前搞「搶紅包」，係因為微信支付剛起步，想用「搶紅包」帶多啲人用微信支付，但早前管理層傾過，認為「搶紅包」嘅歷史使命已經完成，嚟緊農曆新年可能唔再搞。
不過咁，絲絲聽講，打算停嘅只係「搶紅包」營銷推廣，微信嘅「發紅包」功能仍然有。過年唔搶過紅包咁周身唔聚財的話，自己發啲紅包出去畀Friend畀同事搶都仲得。
余絲韻