仲有幾日就到一七年，唔少人都會新年許願，新開始咁有計劃，明年仲唔事事順利！原來未必，專家竟然指，新年許願嘅人更難實踐目標，反而放棄許願令人活得更健康快樂。
有研究顯示，四分之一人呢頭定好新年願望，一個星期都未過已經放棄！估唔到有咁多人同絲絲一樣……咁冇恒心。
點解唔許願會仲好？倫敦商學院組織行為學教授Madan Pillutla舉例話：「對於冇許下願望嘅人嚟講，當佢喺周中發現自己成個星期都冇運動，反而會有較大推動力即刻去做Gym。諷刺嘅係，當許落一星期至少要做五次Gym嘅願望後，往往比冇立願仲難達標。」
即係平日做事求其，但又Set到個目標非常高，仲懶係要100%完成先安樂。嗱，中途有小小跟唔上就同自己講「算吧啦」，索性放縱，最終全年目標都付諸流水。咦，係咪好熟口面呢？
最搞鬼係即使立願失敗率咁高，都仲有六成人喺下年立相同願望！Pillutla教授話，人會過分高估自己嘅達標能力，又無視失敗經驗，所以會許唔符合現實嘅願望。
睇到呢度仲堅持新年許願？得，教授話要先了解之前失敗理由，繼而定可行兼唔使每日實踐嘅目標。計絲絲話，不如面對現實，唔好逢有新開始就FF！
余絲韻