絲絲講場：獅王破格女人揸Fit？
滙豐控股（00005）主席范智廉出年就退休，到底邊個將會係獅王話事人？外邊有風吹，估滙控今次可能會突破環球銀行傳統，委任女性做繼任人！若然係真，咁就係150年來首次有獅子女領軍！
明明之前傳緊主席繼任人大熱係男人？你有所不知，原本位大熱係曾任AXA安盛主席及行政總裁嘅卡斯特（Henri de Castries）大把路數，有聲氣話佢有意參與法國新一任政府嘅工作，即係做唔做滙控主席都仲有變數，所以滙控有需要再覓人選。
搵新主席 飛起老臣子
滙控一早已經講明，唔會起用集團老臣子做新主席，所以人選有限，意味滙控提名委員會向外搵繼任人嘅機會較大。
有外媒就估，領導委員會獨立非執行董事駱美思（Rachel Lomax）本身就係個女強人，佢有機會破格為滙控選用女性做舵手。駱美思會向邊位埋手？聽過目標包括滙豐北美主席苗凱婷（Heidi Miller）、英國財政部委員會成員Sarah Hogg同埋西班牙國家銀行旗下Santander UK嘅英國舵手Shriti Vadera等，其中又以Shriti Vadera呼聲最高。
大熱係英銀行掌舵人
Vadera大有來頭，佢自二○一五年起擔任Santander UK主席，係第一位英國大型銀行女揸Fit人。Vadera現年54歲，佢早年職場生涯非常之唔容易，當年男女不平等問題嚴重，甚至有高層直頭同佢講，話Vadera唔係佢平時會請開嘅員工，事關客人都唔預期見到有女高管咁話。
依家可算時移勢易，當年話「唔請開女人」嗰位，今時今日會喺邊度呢可？
余絲韻