孖妹S檔案：港股吊鹽水 點自救過年？

黎：時富金融優越投資服務部顧問 黎永良

有閒錢可慢慢買貨

彩兒：港股今年嘅升幅已打回原形，幾時先有機會打番支強心針？

黎：我又唔覺得港股係氣若游絲，應已離底不遠，低位已有人撈緊貨，基金撈貨又唔會出聲。我已好習慣睇到呢啲季節性調整，一來年尾銀根緊張，無論香港定內地公司都沽啲貨嚟填氹、回水，今年內地銀根又相對緊張，喺兩萬四千幾點已開始沽，加上美國候任總統特朗普即將上場，又加息，又多變數，好多芬佬喺高位做埋沽空，搞到股市跌落嚟。

假期後大市料回升

黎：不過，見到有啲A股，如東方航空（600115.SH）曾升10%，就睇到有人補緊倉！最近成交淡靜，散戶梗係唔敢做嘢，咁對大戶嚟講最好，大市陰陰乾，吸引佢哋低位買貨，若有閒錢，不妨吼低慢慢買貨，但就梗係唔係滙豐控股（00005）喇，睇到60蚊時啲基金係咁唱好，去到67蚊係咁沽，我覺得完成回購後好大機會回落番去60蚊樓下；相反，好多跌得勁嘅藍籌又或者其他板塊，正路嘅龍頭股值得諗。

Kitty：咁幾時先有催化劑谷番起個市？我哋今年收心養性，留番喺香港慳慳哋過新年，但日日睇住個市咁，搞到心情差過核爆喎。

黎：過咗年後，等大家放完假，喺高位沽空嘅基金開始喺低位平短倉，大市應會回升，因喺兩萬一千幾點，根本冇理由沽貨，依家又冇乜壞消息，催化劑就要等內地銀根鬆番、投資者停止掟國債、內地經濟數據有鼓勵性；美國經濟好轉，加息循序漸進，投資者就會忘記加息壓力，道指再破頂對港股有幫助；內地供給側改革已見成效，情況唔係咁差，未來要注視特朗普上任後政策，傻佬上場都唔知會搞邊科。

環保軍工電訊值博

彩兒：邊啲股份先叫正路？你有乜心水，指點吓我哋啦。

黎：部分環保股、軍工股、高科技股、電訊股、物流股可留意，因見低位已有唔少人買緊貨。你睇番壽險股，未來息口走勢有助刺激呢類股份收入增加，因佢哋唔止投資股票，亦有投資定息產品，所以有機會賺多咗。至於其他金融股都有人買緊。但大戶冚倉又唔會冚得咁快，因明知你班散戶驚青，成交又少，所以依家咪陰陰乾，以上板塊龍頭股依家值得諗，中長線投資都OK。

黎：揀股時宜選龍頭股、管理層正氣、過往歷史有盈利、派息又合理嘅公司，其中我特別鍾意基建股，主要受內地對行業需求大、一帶一路等政策帶動，鐵路股、港口碼頭股都會受惠，但要留意，公路股就冇咁勁。環保股都掂，內地霧霾咁勁，環保行業持續發展，當中太陽能、水電、風電同綠化公司吼得過。至於供給側及需求側相關企業都值得關注，如零售、體育用品、日用品及汽車行業等，嗱，新能源汽車，包晒環保、消息同高科技概念，就至正喇。

Kitty：有冇邊啲股份真係掂一掂都冇運行呢？

黎：中央經濟工作會議講到明「房子是用來住，不是用來炒」，分明係打壓房價，且息口趨勢向上，所以一定要避開內房股；仲有人仔不斷貶值，美元又抬頭，原材料入口股弱勢，美元兌人仔見7.2至7.3唔出奇。

林：光銀國際董事總經理兼研究部主管 林樵基

大跌藍籌料將轉身

Kitty：雖唔少股友收埋鑊剷放大假，但個市都唔使咁悶啩，提早部署定迎戰新年又掂唔掂？

林：大市近期跟中國同美國走，美股波動性減低，但暫會維持高水平，港股喺受中國因素影響下，走勢會呆滯啲，主因近期走勢較受人民幣匯價困擾，未來喺特朗普上場就任美國總統後，會點樣影響中國政策？咁都會影響到股市走向，估計股市會偏向牛皮啲，悶市會延續。

若係中長期投資者，可留意一月份，因一月份係傳統借貸流動性會增加，且銀行首季度放貸量會大啲，一啲早前累跌得多嘅優質藍籌股，呢兩個禮拜會係吸納嘅好時機，呢拃股份一月會出現反彈。

彩兒：有乜心水股可以先吼？

林：由於香港拆息偏高，對國際銀行同香港本地銀行股都有支持，尤其是喺市場上拆借出去比較多嘅，如滙豐控股、恒生銀行（00011）、渣打集團（02888）同中銀香港（02388）等，相信前景會佔優。

林：雖深港通推出後，十二月都係弱啲，但係一月份流動性慢慢緩和番，尤其是中國國債問題紓緩番，流動性釋放出嚟後，利好資金透過滬港通同深港通嚟港股市場，到時港股就會做好啲，另人民幣貶值幅度仍較大，所以國際銀行股，同埋用港元或美元結算嘅公司會有好勢頭。

Kitty：想平安過年關，可以點自救？

林：依家成交量好弱，若未來兩周可每日有500億元成交已飲得杯落，好難講乜板塊會跑贏，所以不如提早部署一月份投資，都係好策略，其中我特別睇好滙控，因佢一回購完就見回調唔少，第二日即刻彈番，反映市場仍有需求，買佢冇咁易輸，皆因股息率有逾6厘，高股息可維持，係銀行股中首選，股價62元左右已算着數，可開始收集。

醒你靚靚投資組合

林：喺國指入面嘅內地券商股可留意，因近期成交量低，影響注重融資融券業務嘅券商，市場期望一月份流動性增加，會利好股市同埋呢類股份，我個人偏好中國銀河（06881）、廣發証券（01776）等券商股。

彩兒：幫手砌個靚靚投資組合吖！

林：若唔怕高風險，可揀新經濟股，如科網股騰訊控股（00700），同埋係國指成分股嘅醫藥股，如國藥控股（01099）；低風險取態人士可揀主力以商廈收租嘅房地產投資信託基金（REITs）同埋公用股，如穩定性同股息率都較高嘅中電控股（00002）。

若有料報畀彩兒同Kitty或有嘢問，可電郵money.biz@on.cc

Kitty、彩兒