期指觀瀾:陰乾市炒家無運行

聖誕假期前的交易日,港股交投未見起色,花生友為恒指直插250日線納喊助威,殊不知上周五,大戶趁靜市,把一隻建行(00939)臨尾推高百分之三過外,即時令跌幅收窄,恒指埋單跌61點收21,574點。

講到咁精彩,查實低位計只係拗腰彈83點,全日恒指在110點波幅內完成,主板成交僅503億元,本周剩低三個交易日,十二月期指期權聽日結埋算,索性提早放假好過,斷估聽日午後結算價塵埃落定,個市肯定靜到支針跌落地都聽到。

美股幾時見頂,港股何時觸底?是最多人問的問題,個人睇法,華爾街棄債追股的音樂椅遊戲,好大機會在一月二十日特朗普宣誓就任前任何一分鐘告一段落,發生sell on fact的逆轉市況。

反之,港股是比較難睇,集體意志落到250日線反彈?睇番上一次穿位,是去年港股大時代之後,去年的七月八日確認失守,即日由250日線隊多2,037點先肯停。不過,目前港股估值及氣氛不可同日而語,殺傷力亦不可相提並論,但睇唔到短期有利好因素,可以催化基金經理轉軚入市。對比大冧市,陰乾市況對期指炒家更難頂。

John Mullen