絲絲講場：湯文亮明寸老施睇錯市

話說湯文亮尋日喺facebook度貼文話，每逢年尾，啲財經地產投資研討會非常咁頻密，不時遇到一啲老對手，而佢真正嘅老對手係施永青（絲絲一路仲都以為係林一鳴添）。湯文亮話唔明，話老施係物業代理界老行尊，但預測樓市嘅準確程度唔高，過去幾年經常睇樓市跌，但事實樓市就升。

湯仲提到舊年底一次港台研討會，老施一邊預測今年樓市跌，又一邊自嘲話多數唔準，話中原城市領先指數經常喺佢睇跌時反升，又話咁反而證明指數獨立運作。

湯文亮當場就話，老施咁係「捨己為人」，佢預測樓市跌，等啲伙計可以借啲意向地產商鋤價，否則地產商唔會減價，所以佢係為咗同事利益，特登睇錯市。阿湯又讚施永青EQ非常高，估唔到當場施就話連自己都唔知道有呢個企圖。湯文亮話自己就被呢一句話「KO」，不得不佩服老施喎。查實，絲絲夠對阿湯不得不佩服啦！

余絲韻