魚缸趣譚:全球資產無樂土咪撈底

先後於英國脫歐、美國大選和意大利修憲公投的舞台上巡迴演出,嚇倒過全球成千上萬投資經理的驚嚇劇目《天鵝湖》,終於都在周四凌晨,假聯儲局的議息會議內上演了今年度最後一幕喇!

負責於最終回執導的耶倫,果然無令全球投資者失望。她先順從民意,於前戲部分宣布加息四分之一厘,再爆大冷於戲肉部分預測明年會加息三次。話音一落,全球的股、匯同債市便即時劈劈啪啪咁跌下來贈興了!

鑑於美國加息步伐可能加快,美匯指數於聲明後進一步上揚,執筆時已見過102.668的十三年來高位喇;至於十年期美債孳息率飆至2.6厘樓上。相比之下,在港上市的高息公用股同房託基金的收益更不值一提。本來已經急遽移離港股的游資再開turbo,穩定如領展(00823)都一日大跌4%,真係無陰功!

金價於昨日黃昏落到1,130美元樓下,好坦白講,我認為金價於隔夜從1,140美元彈番上1,163美元嗰一下好fake人囉!等好多人仲以為金價係咪於最墮落的火海中重生。想創你個心咩!美債又避險,黃金又避險;前者又高息,後者就一丁點兒息都無,投資者又點會買金喎!我預料今趟要落到1,100美元關口都唔出奇。

疊埋心水揸cash過節

金股同ETF就更加唔使問幾時可以撈底啦!全球資產無樂土!當下的我係睇得好灰!我唔建議你於現階段入市撈任何的底囉!聖誕就到,投資經理個個都holiday mood,倒不如揸cash過節,到出年年初再部署啦!揸cash無蟻咬!

富昌金融研究部總監 譚朗蔚(作者為註冊持牌人士)