Market Insight：玻璃股列觀察名單

美元資產大挪移，已不限於債券資金回流股市咁簡單，股市裏面，仲有棄新愛舊的現象。大選結束至今，標誌着美國軟實力的新經濟產業龍頭Google同facebook累積跌咗1.7%及4.7%，跑輸同期道指、標指一大截，同舊經濟股如海嘯之後人見人怕的銀行股比較，更是雲泥之別。

「侵侵」預言以財政政策，大興土木去推動經濟，通脹、經濟增長預期升溫，大家或者會問，講吓就掂咁easy，點解八年以嚟奧馬巴唔出呢一套？

投資者羊群心理，是市場先生無法正確反映真實市場價值的原因之一，特朗普當選人人以為股市末日，無疑是錯判的預期，特朗普可以違反物理原則，減稅而增加政府開支，又唔影響接近20萬億美元的國債上限，世界邊度有咁着數先！不過，市場要錯落去，都無謂同佢拗氣，睇睇宣誓上任後，股市仲敢唔敢咁樂觀。

半新股慎防接火棒

美股升爆，中國出口意外地好過預期，似乎人仔勁貶效果逐漸浮現。惟股市大戶一個唔該，昨日趁兩大利好消息將指數推到上兩萬三點樓上，沽盤浪接浪，恒指由最多升276點到埋單升得60點，收22,861點。連升幾日的滙豐控股（00005），都頂唔順倒跌收報65.35元。

近期焦點的半新股，都見一副散水格局，「越南河」膳源控股（01632），朝早見17.5元創新高後，埋單插返落10.84元，跌6.24元，得50球街貨，股價隊成咁都仲搓到19球成交，睇嚟莊家成功派到部分貨源畀散戶接火棒。下周中聯儲局息就加硬，港股兩萬三關前三頂不破，臨近周末假期，睇怕今日個市會更加靜，半新股眼看手勿動為宜。

信義玻璃基本因素佳

昨日幾隻玻璃股升得唔錯，洛陽玻璃（01108）升一成，信義玻璃（00868）及福耀玻璃（03606）分別升6.5%及4.3%。洛玻公布已簽訂三份重大資產重組協議，涉及收購三間新能源公司，刺激股價以大陽燭上升，收報5.71元。

洛玻重組成效待顯

集團業務表現一般，今年首九個月虧損較去年同期收窄，惟仍錄得7,104萬元人仔虧損。今次的重組會否帶來起色，仍有待觀察。

信玻成功投得深圳市前海深港現代服務業合作區內的土地使用權，計劃興建兩幢辦公大樓作為總部。集團主要產銷浮法玻璃，另有汽車及建築玻璃，上半年多賺44.9%，來自大中華、北美洲及其他國家的收入均有增長。

隨着內地有唔少基建項目落地，另正於馬來西亞建立生產線，有助拓展東盟客戶。該股近月喺5.8元附近整固，有基本因素支持，相信後市不乏反彈空間。

古勝