絲絲講場：盛寶十大驚奇係「明燈」？
臨近年底，又係時候拎個水晶球出嚟。一向語出驚人嘅丹麥盛寶銀行（Saxo Bank）發表二○一七年驚世預言！究竟有幾驚？都幾驚，唔信睇吓右下個表。
估滬綜出年破5000
該行預言中國國內生產總值（GDP）出年急升至8%！絲絲睇番，今年如果全年保得住6.7%，已經叫做鬆一口氣，嘩，出年8%？！
盛寶仲話A股會爆升，滬綜指出年會高過5,000點！咦，滬綜指尋日收3,215點，嘩！仲有至少55%上升空間？！若然係咁，唔爭在港股有望重見3萬點！
佢哋又預料英國「脫歐」最終變「留歐」，話因為全球民粹主義興起引發恐慌，令歐盟同英國多多合作，唔畀英國走咁話。
更驚人嘅係，盛寶預測，因為美國候任總統特朗普大推財政刺激政策，搞到美元同美息急升，令美國10年期債息升到上3厘，迫到聯儲局學日本央行咁，將依家處於2.4厘嘅10年期債息控制喺1.5厘。
上年錯到離晒譜
呢啲預測可以信幾多？嗱，自己睇。就咁嘅，盛寶嘅二○一六年預測話過：今年油價回升至100美元（實情依家得番50美元左右）；佢估美元貶值，歐元升值（明顯錯到離晒譜）；又估全球企業債券崩盤（依家未見有嘢喎）；估奧運會帶動以巴西為首嘅新興市場復甦（見唔到囉）；又話美國民主黨喺今次大選會贏到開巷（擺明大錯特錯）；估厄爾尼諾導致通脹飆升（冇咁嘅事）；又話歐盟推出基本保障收入計劃，奢侈品需求急劇下降（又錯）；仲講過硅谷「獨角獸」回到現實（唔覺囉）。
嗱，不過咁，你又唔可以話人哋冇料到喎，事關你將個十大預言倒轉嚟睇，咁就準囉！喂，咪住先，佢哋唱好A股出年至少升五成，咁咪即係……
余絲韻