Market Insight：銀行股硬淨有玄機

特朗普概念散水

一五年十二月，海嘯後美國首次加息，聯儲局預言一六年再加四次，最終變成空頭支票，拖到一年之後先加第二次。上周五美股牛皮，美匯輕微回吐，勁插的金價谷底反彈，炒咗一浸的特朗普經濟學，美國投資者看來趁意大利憲制公投前，先打番球修正球，為近日部署食一食胡。

一六年，國際政經時區頻頻爆冷，英國脫歐公投及美國總統大選，結果都出乎華爾街意料之外。不過，意大利公投似乎用「黑天鵝」去形容並不太恰當。古勝不是說今次公投影響唔大，事實人人估A開個B，結局出人意表先叫得上黑天鵝，然而民調顯示，今次意大利反對派勝出，否決總理倫齊的修改參議院議席機會較高，大家反而要為後續收拾殘局的方向去想，即時的震盪未必好似對上兩次咁勁。

美元資產續受捧

意總理倫齊，事先張揚一旦不獲通過會辭職，意大利疑歐派可能冷手執過熱煎堆。本來歐盟想以英國殺一儆百，不過外強中乾的最後硬唔起嚟，依家成員國個個籠裏雞作反，趁今年多國大選及公投，趁亂向歐盟攞着數。今次意大利公投，否決的結果唔會令市場吃驚，歐洲立立亂之下，就算無特朗普經濟學的蜜月期，美元資產地位，實在捨我其誰。

今日深港通終於通車，上周五所見，大戶好消息出貨格局，炒咗一輪概念，好似券商股、科技股股價都散散地。近排阿爺雷厲風行嚴打走資，境外人仔拆息挾高，照計有港股通戶口，無理由唔落嚟掃番多少滙豐控股（00005）、渣打集團（02888）等美元資產股票，減低人仔貶值衝擊兼收下息，上周五兩隻銀行股股價，市散佢唔散並非無的放矢，中長線仍可睇高一線。

出口股未宜看淡

因特朗普上場帶來的憂慮涉及範圍甚廣，經濟肯定係重中之重，話晒美國都係全球最大經濟體，加上全球一體化之下，各國關係千絲萬縷，隨時牽一髮動全身。雖然古勝覺得堂堂大國，政策冇咩可能出現顛覆性改善，總統唔係大晒，議案要有國會通過，而佢勝選之後的表現都「正常」好多啦！

至於同中國的貿易關係，美國想退出TPP，對中國影響不大，但如果引發其他國家採取貿易保護措施，或間接令中國出口的阻力增加。早前見兩隻出口股喺十一月九日大跌，敏華控股（01999）連續三日向下，加埋跌咗12%，創科實業（00669）由30蚊落到27蚊水平。其實兩股基本因素唔差，惟因市場恐慌影響股價。

敏華中期多賺44%，北美、歐洲及其他海外市場業務倒退，內地市場則快速增長。集團主要喺內地做生產，早前公布擬與東歐企業Home Group合作，成事後，可使用Home集團位於烏克蘭的廠房，有利帶動海外市場。

回購股份利股價

創科主要產銷不同類型電動、手動工具，中期純利增12%，北美洲市場仍然係最大收入來源，佔總營業額的75.3%。事實上，旗下唔少品牌都係藉併購拎番嚟，呢啲海外品牌本身業務亦唔錯。

最近兩股股價基本上完全收復失地，負面消息相信都反映晒，兩企業最近亦多次回購股份，加上人民幣貶值利好出口股，後市毋須睇得太淡。

古勝