絲絲講場：MPF收費或愈貴愈廢

話說強制性公積金計劃管理局（積金局）做咗項研究，發現強積金嘅開支比率（即係「收費」），同基金嘅投資表現並冇關連，直接講即係強積金收費高唔代表回報好！

同投資表現唔掛鈎

積金局早前做咗項關連測試，結果顯示，「股票基金」同「保證基金」嘅收費，同佢哋過去一、三、五年嘅投資表現並冇任何關係。

咁都算，如果你強積金組合入面有「混合資產基金」、「債券基金」同「保守基金」的話，唔該打醒十二分精神，事關報告顯示，呢幾類基金收費愈高，投資回報反而愈差！

特別提提，香港人向來鍾情嘅「香港股票基金」都係屬於收費愈高回報愈低。知道呢個殘酷事實後，真係建議你睇睇自己嘅強積金組合。

開支比率跌到新低

積金局非執行董事蔡永忠話一直努力推動減低強積金收費。成績？截至今年十月，強積金嘅平均開支比率已跌到1.56%嘅歷史新低。積金局機構事務總監及執行董事鄭恩賜補充，自從預設投資策略（DIS，即係俗稱懶人基金）條例出台後，至今已有四十個基金減費，認為未來收費水平仍有相當大嘅下調空間。

蔡永忠話，DIS管理費連雜費上限唔多於0.95%，而呢個上限只係個起步，三年後會再檢討，目標係進一步降低；佢又希望，DIS運作一段時間後平均開支比率可低於1%。

喂，睇咗咁耐，係咪要(目及)實份MPF先，血汗錢嚟！

余絲韻