今日同大家來一個walk-through，即係「穿越訓練」，無錯，就係潛行凶間，即係「Inception」嗰隻！首先，全部人同我合埋雙眼，然後放鬆，你見唔見到前面有個女人呀？無錯，就係企響克林頓隔籬嗰個，唔係萊溫斯基呀，係另外一邊，係，就係佢，係希拉妮。
你試幻想一下佢當選咗美國總統，邊個最開心呀？梗係華爾街班大帝啦。點解呀？因為佢哋之前做咗無數捐獻畀希拉妮老公個基金會吖嘛！家吓希拉妮當選，佢哋總算押對咗邊。佢哋好開心咁買股票，個指數一路升，佢哋就一路歡呼！側邊有個癲佬就係輸咗嘅特朗普，佢竭斯底里大叫「冚扮爛都係佢嘅人，咁公平咩？」但係無人會理佢。墨西哥披索係咁升，曉飛咁款；個金價係咁跌，一路碌碌碌……
好！大家可以睜番開對眼喇，喂，返來囉！會唔會覺得有少少頭暈同想嘔先？無嘅話，我地又嚟過囉喎！好，全部人合番埋眼，深呼吸。見唔見到有個癲佬呀？頭先掟咪嗰個呢！係呀，佢終於都當選咗美國總統喇！
你睇返班金融大鱷，個個年初四咁樣。點解呀？爆冷吖嘛，買錯邊呀！老羞成怒，咁咪發老脾，掟股票囉！
佢哋將筆資金轉晒落黃金度，個金價就係咁飆，轉個頭已經上返去1,300美元樓上！
你再將個鏡頭zoom返嚟港股，恒指又失守100日線落到22,500點樓下！熊軍嘅朋友又係批地產呀、REITs呀，隻隻跌到嘭嘭聲。鬼咩，市場憂慮鷹派上場，聯儲局要加大息嘛，美債孳息都上晒啦……好喇，訓練時間到此為止。大家又係時候睜番開對眼，睇實美國大選點票結果喇！
富昌金融研究部總監 譚朗蔚（作者為註冊持牌人士）