絲絲講場：騰訊 京東翻玩蓋茨雞仔橋
雞！全部都係雞！內地兩大電商嘅騰訊控股（00700）嘅大佬馬化騰同京東商城嘅劉強東，近日搞咗一項公益活動，就係送雞仔扶貧，仲順手帶挈公司添。
兩位大佬今次嘅活動號召天下各位網友，共同捐贈出每日嘅微信運動步數，每累計到10萬步，將由京東為貧困地區農民捐出一隻雞仔。農戶拎到雞仔之後，可以根據指導飼養，養成後京東將會回購並喺京東商城出售，希望藉此幫助農戶通過養殖實現脫貧致富，同時間微信和京東商城都有着數！
正所謂「橋唔怕舊」，以上兩位大佬呢條送雞仔橋其實係老翻自全球首富、微軟創辦人蓋茨。
話說今年六月嗰陣，蓋茨同國際小母牛組織（Heifer International）合作，向撒哈拉以南非洲地區為主嘅貧窮國家捐贈10萬隻母雞。蓋茨計過，當一個家庭獲得5隻母雞和1隻公雞後，三個月內會變出12隻雞，一年內會再變出250隻小雞。喺西非一隻雞值5蚊美金，咁樣一個家庭一年收入就可以超過1,000美元。
網民讚兩位技高一籌
話時話，大家都係送雞做善事，邊個Plan勁啲先？原來網友覺得，騰訊同京東兩位大佬嘅送雞仔計劃高班少少，比蓋茨更識見「雞」行事。因為佢哋食腦，做善事之餘，仲將件事轉化為商機幫番自己，施同受一樣有福。睇番蓋茨，佢就單純出錢，數口雖然精，不過微軟自身就冇乜商機喇！
事實上，截至尋日，已經有近2萬名網友參加咗送雞仔活動，捐助嘅微信步數已經接近2億步，京東亦已捐咗1,900幾隻雞仔。
余絲韻