今個星期，我幾晚都噩夢。我夢見有一個男人，披頭散髮的，成個頭都金色，我望着他徐徐步入白宮，當上了美國總統，之後，道指就急瀉如注喇。唉，我諗我都是工作壓力太大，以致有幻覺，但是那幻覺，卻又來得好真實咁！
我今早醒來便去求證，發現原來墨西哥披索兌美元的匯價於上月的二十五日已經見了反彈頂，其後，墨西哥披索的匯價便跌到依家。我頓時有種dream comes true的預感呀！事關我一早已經講過，墨西哥披索的匯價是特朗普當選的風向儀，有佢就無墨西哥！
前兩日睇新聞，原來於過往每當美股於大選前下滑的話，八次就有七次都是由在野黨成功「挑機」，即是變天啦！如今標指已經跌破了2,120點的防線！綜觀上述，豈不特朗普幾乎可以book定枱準備慶功？照咁睇，真係唔到我唔驚！
聯儲局一如預期維持利率不變，但就強調經濟復甦的步伐其實是ok的，咁即係話十二月加硬息囉！接下來，美國大選進入大直路，市場唔再需要周圍望，只是望維基解密的社長阿桑奇點發功，於大選前KO了希拉妮就得啦！
「電郵門」都已經out喇，最新的一集已經講到希拉妮透過老公克林頓的基金會來收受華爾街的賄款喇！希拉妮的民望跌得快過個市，目前已被封為「美國史上第二最不受歡迎的候選人」（第一當然係特朗普啦！）粉絲們繼續盯緊墨西哥披索來炒市，並準備好迎接我的噩夢成真啦！
富昌金融研究部總監 譚朗蔚（作者為註冊持牌人士）