Market Insight：券商股熱身等開車

引用賭馬術語，一六年國際大事確實爆冷連場。既有英超由季初1,500倍大冷門的李斯特城奪冠、英國公投脫歐、八度獲提名諾貝爾文學獎的村上春樹，不敵詩人歌手Bob Dylan等，世事如棋局局新。

貧富懸殊加劇惡果

古勝睇過兩場特朗普電視辯論，信口開河以外，實在搵唔到更貼切去形容狂人政綱。狂人能殺到入最後直路，無疑同金融海嘯過後全球貧富懸殊加劇，銀行家貪婪底牌被揭破，人們經歷震盪教育，民粹主義抬頭。

去年希臘公投，陷破產邊緣的希臘民眾還要選出左翼的齊普拉斯，誓要同歐盟攬炒；英國過半數選民也無視與歐洲割席對經濟引發的連鎖反應；特朗普過五關、斬六將，絕對唔係符碌！美國人在海嘯後，大部分人分享唔到復甦好處，決定用腳投票，以支持狂人去表達對政府不滿。俗語話爆開就爆，股友多少都要為下周股匯市做定防震措施。

深港通料帶旺交投

近日內地公布的經濟數據良好，港股藉好消息反彈，惟一日就無以為繼。另一方面，A股昨日低開高走，滬綜指升26點，收報3,128點。近期滬深兩市出現放量，昨日成交有6,400億元人仔。早前唔少分析都睇好A股喺末季的表現，加上現時投資氣氛有好轉迹象，且看是否有機會突破近幾個月阻力3,140點。

市況淡靜，但見多隻中港券商股靠穩，除咗獲泛海提全購的華富國際（00952）升一成，第一上海（00227）、招商證券（06099）及海通國際（00665）均升逾1%，HSTC（華泰證券）（06886）、海通證券（06837）及中信證券（06030）則微升0.2至0.7%。

券商股喺八月中藉深港通消息升過一輪後，至今基本上處於橫行、窄幅上落格局。雖然上半年，甚至首九個月的業績麻麻，但始終舊年大時代的基數高屬個別事件，好難咁比較。

港股調整多時，美國大選後應有較明確方向，而深港通將至，北水若增加，券商股可直接受惠，不妨吼位部署短炒一轉。

郵儲行現價猶如雞肋

過去八個交易日有七日見紅，個市曳成點，一清二楚。七、八月本地芬佬贏到開巷，本來九月中旬開始的上落，仲可以牛皮在高位守住，自從港股通淨流入大縮水，連A股大媽都話睇定啲，芬佬等唔到深港通開車，紛紛搵食胡理由。

「一路唔發」的中國郵政儲蓄銀行（01658），過咗上市價格穩定期後，上星期隊到落最低4.11元，近幾日級級上，昨逆市升0.05元報4.36元，在下認為已返回食之無味的水平。

無疑買得郵儲行，都係想賭佢入MSCI或者富時指數，博基金要照單執藥買番上去。以郵儲行晒士，入MSCI唔難，問題係上市得一班基礎股東捧場坐重貨，流通量唔夠，大摩講明唔會特事特辦，意味十一月中的指數成分重組好大機會懸空，個市唔多就，想長線的似乎唔使急於一時。

古勝