絲絲講場：中銀輪王快做富爸爸
輪場又有喜事喇！中銀國際股票衍生產品聯席董事葉滙豪（George）一踏入十一月，即喺佢嘅臉書上「放閃」，宣布佢同太太Mandy明年再冇二人世界喇，原因係佢哋要做爸爸媽媽喇，結果吸引數百個讚好同祝福。恭喜晒！
當絲絲問到係唔係暑假時兩公婆到英國旅行時「造人成功」，George靦腆地話都有少少關係嘅。
向金融界老友取經
雖然暫時未知係仔定女，佢哋都一樣咁開心！Mandy嘅預產期係明年五月，而George依家已經急不及待要向金融界朋友取經，學做新進爸爸。佢仲爆料話，依家太太要戒生冷、煎炸等食物，但就成日唔聽話，比之前更鍾意食薯片咁話。
余絲韻