絲絲講場：明星股旺場 校長概念搞上市

譚詠麟揸藝能逾6%股權

睇返公司初步上市文件，譚校長舊年喺香港舉辦的「銀河歲月40載」演唱會，同佢今年喺中、美、馬來西亞等地製作嘅演唱會都係交畀藝能負責。原來今年譚校長就以300萬元入股藝能環球，揸住6.67%股權，絲絲仲發現集團總經理兼執行董事張偉鋒仲做過李克勤嘅私人助理添！

藝能九九年起已經籌辦過逾200場演唱會，單係截至今年四月底止年度，已經為容祖兒、李克勤，同埋溫拿舉辦演唱會，期內籌辦演唱會的收入佔比近70%，總收益按年增長16.29%至1.18億元；年內溢利按年升82.94%至1,942.1萬元。所以話，搞Concert都真係幾好賺！

小肥牛Bar Pacific排隊上

本地飲食股亦都排隊上市，專營蒸氣石鍋同九層海鮮塔的「小肥牛」母公司國茂控股上月都遞咗表申請創板掛牌，「小肥牛」目前喺香港有9間分店，截至今年三月底止年度賺820萬元，不過，七月底止首四個月就因為非經常性開支倒蝕212.5萬元。

夜場股大家就聽得多，酒吧股應該無聽過喇啩！話說本地酒吧「Bar Pacific」早排亦以太平洋酒吧集團名義申請喺創板上市，公司依家喺香港有32間地舖，並且計劃今年底前喺柴灣再開新店。

余絲韻