孖妹S檔案：好淡友對決 後市逐樣撼

白宮新主 兩種炒法

林：財經專家 林一鳴

彩兒：散戶聽到美國就嚟大選就鳴金收兵，嚇到魂飛魄散，究竟我哋應該點對抗特朗普呢隻肥嘟嘟嘅黑天鵝？

林：即使特朗普選到都唔係好大件事，最大嘅黑天鵝其實係，佢上場之後，將之前講嘅激進言論實行，例如話將耶倫（聯儲局主席）炒魷魚，佢有機會改變當局決定，將加息步伐加快……齋上任嘅影響可能只係好似英國脫歐公投嘅震盪咁，頂多影響一、兩個禮拜，之後就淡化；反而，市場上關心嘅係，佢會唔會炒耶倫、會唔會將中國進口關稅加到45%、會唔會快速消滅美國國債，甚至喺墨西哥邊境起圍牆？

跌穿兩萬 輪證可吼

Kitty：特朗普贏到，會唔會即刻推冧恒指？

林：要視乎市場預期，現時民調明顯顯示希拉妮會贏，大家都估緊特朗普會輸，之不過，選民一向都唔太理性嘅，所以睇民調其實完全唔可以用嚟預計結果，完全唔好理民調喇。

對恒指最大影響嘅情況係，臨選前兩、三日，全部民調都顯示希拉妮會贏，但最終結果相反的話，咁先會有大跌幅；若然選之前係勢均力敵，或者特朗普贏嘅機會有一半，喺咁嘅情況下贏到，無論對港股同美股嘅短線影響都唔會太大。如果希拉妮贏，恒指有機會炒上，回升至24,000點水平。

彩兒：唔通要我哋翹埋手，等運到？

林：現時應暫時抱觀望態度，如果去到臨選前，睇到民調顯示希拉妮會贏嘅話，可以以小量資金沽空期指、買熊證等淡倉，博黑天鵝（出現）；若然民調顯示係特朗普會贏就乜都唔使做喇，因為股市已經會跟住民調向下調節。

參照英國脫歐公投嘅情況，若然美國大選民調同結果差距大，恒指有機會跌穿20,000點。一旦呢個情況出現，反而係一個值博機會、吸納港股嘅好時機。

可以用小量資金做高槓桿投資短線博反彈，因應我覺得港股仲處於牛二階段，波幅區間係20,000至25,000點，所以穿20,000點可以買入期指、認購證或牛證短線博反彈，彈番一、二千點就要平倉。其後就要觀望會唔會出現第二個黑天鵝，咁就有機會捕捉第二次調整。

牛二策略 跟大圍買

Kitty：若然美國選舉結果同市場預期一樣呢？

林：咁就一路用牛二策略即可，未來一年都會處於牛市，策略係炒上落市，中軸係約23,000點位置，升至24,000至25,000點就減磅，而20,000至21,000點水平就加注，買番大圍相對穩陣嘅板塊，如果係炒指數，就可以投資Beta值較高嘅股份。

如果喺牛二跟市投資，一年回報可能係零，想收息，就可以考慮內銀同內房股，博每年有8至10%回報，作為中長線投資策略，而滙豐控股（00005）都係好選擇。內地十月初出咗好多限購同限貸令，內房股平均較十一期間嘅高位已經調整十多個百分點，其實相關措施過往已多次推出，效果唔大，所以現時可趁壞消息低吸，回升一至兩成就可以平倉。內地最興打擊內房後推內需，亦可以考慮吓家電股龍頭！

美無條件大幅加息

彩兒：驚唔驚美國加息之後，高息股會唔掂？

林：若希拉妮上場，我唔太覺得會大幅加息，聯儲局近年講咗好多次大話，係「狼來了」嘅故事，若然喺環球都係零息水平下，美國加息一厘就會令美金扯咗上去，導致美國經濟受到史無前例嘅打擊，所以佢係冇本事加息，十二月加息機會低於一半，未來一年之內頂多會加四分之一厘，加咗大家就唔使心掛掛。

Kitty：深港通就快嚟料，班股友都好興奮！

林：其實第四季焦點都係美國大選啫，深港通對港股影響比滬港通更細，內地人要買港股就買咗好耐，所以推出只屬炒消息，港股唔會因為咁而多咗成交，冇直接影響。

美股勢危 恐挫九成

許：投資港董事總經理 許沂光

Kitty：唉！上星期恒指跌穿23,000點大關，睇到股友標晒冷汗。

許：港股由二月約18,000點上番嚟，應該都就快反彈完，再升幅度有限，下跌機會同空間都多啲，穿23,000點就會試深啲，暫時減咗磅先啦，唔好揸咁多貨！依家難睇會下試到乜位，所以啲人都未覺得有事，但睇怕出年會麻煩啲，因最悲觀預期係美股隨時跌九成，勢拖累港股。

美國債務踏不歸路

彩兒：你呢個長期大淡友點解覺得美股勢危？

許：美國總統尼克遜一九七四年因水門事件（Watergate Scandal）辭職，喺美國歷史遺臭萬年，佢七一年做咗項影響更加深遠嘅決策，就係宣布停止各國央行用美元向美國兌換黃金，後嚟同意將美元貶值7.89%，黃金嘅官價係每安士38美元。

七一年之後，美國信貸市場總債務勁升，依家已升至64萬億美元，同期美國GDP增長緩慢。總之，美國信貸市場總債務同GDP之間呈現血盆大口，美國人債台高築，永世都還唔清，加上美國人喺國外征戰頻繁，美國已踏上羅馬帝國滅亡嘅不歸路。

股市爆煲 慘過股災

Kitty：美國總統大選，換個人上台，會唔會有可能力撐美股？

許：因為美國經濟已經開始衰退，美國大選無論係希拉妮定係特朗普贏，美股都要有大調整喇，我睇得好淡……美股由○九年飆升到依家，靠咩呢？都係靠央行（聯儲局）印銀紙，經濟都冇好過，不停咁印落去又唔可以，聯儲局資產淨值係400億美元，但依家持有4.5萬億美元債券（資產），係資產淨值百幾倍，當年雷曼破產時係30倍，我唔知佢可以點樣捱過震盪。

究竟聯儲局可以點找數？當佢4.5萬億美元，輸一成，即係4,500億美元，但佢得400億美元資金，可以點頂呢？投資者近年係炒得好亢奮，但你諗真啲其實就好得人驚！

彩兒：呢一爆勁過核爆？

許：如果美股爆煲，比起一九二九年華爾街股災更嚴重，當年係跌九成，所以依家環球央行做法係好荒謬，好似日本，國家負債係GDP嘅2.39倍，佢點還呢？佢每年新生嘅人係比死嘅人少，人口老化問題嚴重，經濟已經冇增長，個國家係睇幾時滅亡啫，我都唔知啲人炒日股係炒乜嘢。

美國帳面負債19.7萬億美元，未計及退休金及醫療補助，如果計埋有約120萬億美元，一年GDP得18萬億美元，佢點還？睇番基本因素係咁，真係唔敢炒股票！美股明年已經係大限，其實隨時都可以冧，起碼跌九成，一個國家如果係靠借錢嚟度日，冇可能搞得掂，借咗錢係好應該節衣縮食還錢，咁佢反而係愈借愈多，點搞？

宜先行減磅揸現金

Kitty：嘩，你嚇到我心都離一離啊。

許：我建議依家減磅揸現金好過，另外，我睇好黃金價格，黃金長期低位循環周期平均長度係98個月，下個低位預期係十二月出現，呢個周期好重要，每次確認見底之後，金價都有強勁升浪，金礦股都發出強烈買入信號。

若有料報畀彩兒同Kitty或有嘢問，可電郵money.biz@on.cc

彩兒、Kitty