北水頭等倉：航空股有勢再起飛

展望十一月，市場焦點盡在美國總統大選，到底會唔會出現黑天鵝？反正投資者已經作了最壞的打算，盡能力做好防範風險措施，結果係點就只好順其自然吧！

中國郵政儲蓄銀行（01658）自價格穩定期結束後，股價反覆尋底，上周五創新低4.12元，較招股價4.76元累跌13%。事實上，由當日郵儲行招股價定價之高，屬一步到位，已注定今日的局面必然出現。

再講，查實近年唔少大型中企IPO，基礎投資者都以內地資金主導，就如郵儲行、光大證券（06178），招股時機構投資者認購新股的比例高達六至七成，而這些所謂基礎投資者，又以國企佔主要比重，說白點就係左袋入右袋，中企對外融資的意義大打折扣。

最離譜係見到啲香港財金官員成日以去年香港IPO集資額全球最多作為功績炫耀，事實卻是在開拓海外多元化IPO客源方面成績令人失望，靠北水撐住個場！

油組將於十一月底開會商討減產限產議題，到底事成與否，其實相關憧憬某程度已反映在市況上，到變成事實的時候，即使係好消息，股市都未必有太大反應。

石油股莫期望過高

筆者認為，第三季尾至末季初油股及油服股反彈已超額完成，對油價再升不宜作過分期望，現時不妨反手留意航空股表現。

以東航（00670）為例指，近期股價又回落至接近自去年次季以來的主要支持位3.2至3.4元水平，上周五收報3.5元，若然守得住呢個區域，不妨小注一試，博季內發力，中線目標上試250日線4.13元。

同樣，南航（01055）股價已經回落至去年第三季以來的主要承接區4至4.2元水平，中線反彈目檟再叩5元大關。

司慕渢