絲絲講場:前大班慨嘆 滙豐變晒

生日諗起咩?滙豐前副總經理劉智傑(劉Sir)就諗起舊公司。尋日生日嘅佢,仲喺fb貼文講滙豐股價跌有原因,似係慨嘆滙豐唔生性,大有恨鐵不成鋼嘅感覺。

朋友投訴客戶服務差

劉Sir分析,滙豐股價跌有3大原因。首先,各國政府對金融大機構管制太嚴,令銀行成本上升。而且,歐洲仲推行負利率政策。不過,劉Sir認為兩者都唔夠第三個原因致命,最致命就係對顧客嘅傷害喎。有幾致命?劉Sir仲貼埋佢50幾年老同學嘅WhatsApp投訴出嚟。

老同學向劉Sir投訴話畀滙豐啲「所謂客戶經理」激親,仲問劉Sir到底邊位係國際理財嘅負責人,佢要投訴深圳同英國海峽群島嘅服務差到難以想像喎!

劉Sir就感嘆此滙豐不同彼滙豐,佢退休後已經變晒,對於老同學嘅經歷一啲都唔Surprise咁話!仲叫對方去搵滙豐亞太區老頂王冬勝Complain添!

結果老同學回覆話,幫襯咗滙豐超過40年,好遺憾,實在受夠了,依家決定逐啲轉過去中銀!

生日都為舊東家閉翳

劉Sir紅褲仔出身升做首位華人副總經理,雖則佢○○年已經退休,閒時刨吓馬經同佛學咁。但佢始終心繫老東家,○九年仲公開鬧過前主席龐約翰累死滙控,依家生日都為滙豐閉翳,呢啲咪真愛囉!

余絲韻