港股昨日復市，先高開後低走，其後跟隨內地股市回揚，收報23,604點，升229點，主板成交增至740億元。主題方面，雖然市場早前熱炒深港通，但已炒作一段時間，加上按過往經驗，一旦通車隨時見光死，故短期炒「通車股」咪太心雄。
相對地，市場偏靜，不妨做定功課發掘潛力股。中港兩地均對環保政策極為重視，早前就有隻以配售形式上市的創板股沛然環保（08320），雖然股價急抽一輪後就反覆回落，但近兩日跌勢有喘穩迹象，值得望望。
沛然環保睇名就知搞環保，不過原來唔講唔知佢其實主力做顧問角色，按上市文件顯示，業務主要分四大範疇：綠色建築認證顧問；可持續發展及環境顧問；聲學、噪音及振動控制及視聽設計顧問；環境、社會及管治及顧問業務。根據F&S報告，以收益計，集團於一五年在香港整體綠色建築認證顧問市場更名列第一，都算得上相關領域龍頭。
集團執董早前表示，雖然內地目前收入佔比僅7.2%，但內地市場增長潛力龐大，故擬於內地成立子公司，並考慮收購中港兩地具協同效應的顧問公司，且預期內地收入有望倍增。
沛然未來業務能否更上一層樓仍屬未知數，不過既然集團有意進一步擴大內地業務佔比，加上內地企業普遍對香港公司較具信心，若成功在內地打響名堂，發展前景不言而喻。不過，能唔能夠成功，有時都仲係要睇運氣同彩數，投資者就算有興趣，都係先納入觀察名單，睇睇後市走勢再定部署。
帥哥