絲絲講場:「喪師」show股市密碼

股壇好多鬼?喺銀河證券業務發展董事羅尚沛facebook度睇到嘅。仲聽聞話,屍殺列車暗藏港股密碼……

羅尚沛fb有段片,露「腹肌」兼「人魚線」(確係睇唔出佢竟然有呢啲),仲畀隻「鹹濕喪屍」抽水!咁猛?!猛成咁嘅「喪屍」,正確嚟講係「喪師」,即係訊匯證券行政總裁沈振盈(沈大師)!

惡搞名人兼派貼士

提早慶祝萬聖節?啱一半。短片只係製作特輯,完整版喪屍片將會喺Talk Show播出,聽講到時仲會有場「屍殺列車暗藏港股密碼」添。

咩Talk Show?沈大師同羅尚沛(Eugene)於十一月五日搞財經Talk Show「串到盡2」!大師話,今次個Show會多片,佢哋會扮啲政經財金重要人物;會以棟篤笑踢爆啲市場不平事,唔少得佢哋會畀後市貼士。

玩踢爆?驚唔驚行出後台就……「唔驚會得罪人,最緊要莊諧並重,我諗大家都會接受嘅!」到時會扮邊個?「總之喺政界金融界等有代表性、有地位啦!」

Show入面會換幾多套衫先?「好多需要道具、化妝嘅都事先拍咗片,臨場可能換一、兩套衫。」有無古裝同Super Hero?「有啲未決定,總之大家有意外驚喜啦。」會唔會擺屋企人上台?大師笑話「禍不及妻兒!」得得得,大師家人當日會捧場,大家錫住呀。

余絲韻