香港銀行呢排烽煙四起，皆因接近年尾，大家搶按揭市佔率搶到㷫合合！爭得最激烈嘅，必定要數中國銀行香港（02388）同滙豐銀行，兩間龍頭大行今年頭九個月現樓按揭爭到你死我活，暫時由中銀香港領先一個身位咁大把。不過，戰情似乎有變喎！
話說負責按揭業務嘅中銀香港前個人金融及產品管理副總經理周澤慈，原來已經喺十月一號低調退下火線。周澤慈最為人所知嘅，莫過於佢任內帶領中銀香港連續四年穩坐現樓按揭一哥寶座，好威水！
聽聞內部通告未有公布接任人選，但由邊個接棒都好啦，睇怕都好有壓力，畢竟睇番條數，中銀香港目前只係領先滙豐現樓按揭宗數不足100宗，戰況激烈到呢！絲絲都好期待新按揭主管點帶領中銀香港衞冕樓按一哥！
余絲韻