Market Insight：銀行股受惠美加息

大市連升四日，「三桶油」加埋濠賭股領放，恒指昨再升164點報23,952點，主板成交646億元，大戶顯然努力營造牛氣，迎接下周北水重臨，以過去一季，恒指平均每月都交到近千五點波幅，假如月初23,500點是低點的話，月內向上衝見兩萬五點水平並唔係無可能。

事實上，踏入第四季，環球金融市場開局氣氛比想像中好，英國新首相正式提出脫歐時間表，明年三月正式展開分手工作，被市場廣泛視為「硬脫」的宣言，即時的反應，除鎊匯腳軟外，英股卻愈戰愈勇。

有助帶動息差拓闊

美國方面，隨着通脹回升及就業數據唔錯，十二月加息的預期也得到市場充分肯定，利率期貨顯示，十二月出手的機會率升至六成二。常言道半杯水可被視為半滿或半空，市場搵嘢買多過搵嘢沽的情況下，華爾街賓架將升息重點，放在債券孳息脫離平坦回到陡斜，有利銀行拓闊息差。

要押注年底加息受惠股，大型銀行如滙豐控股（00005）及渣打集團（02888）無疑是不二之選；再者，近期美國司法部與德銀就巨額罰款討價還價，傳聞已進入尾聲，如果埋單最後低過盛傳的54億美元，大型銀行鬆一口氣，帶住個市再衝多浸，一啲都唔出奇。

油組（OPEC）達成減產共識後，石油相關股借勢嚟個反彈。呢邊要減，另一邊伊朗就增產。要維持全球原油供需平衡，即係要油組最大產油國沙特「暗啞底」承受？細節要到十一月底會議先有決定。油價雖由44美元水平反彈上近50美元關，其實連七月高位都未到，短炒要見好識收。

除咗石油股，資源類股近期都有追捧，煤炭股表現尤其突出。去產能執行過咗龍，秦皇島港煤炭庫存上個月初跌到四年低位，煤價近幾個月持續上升，加上冬季即將來臨，對煤炭的需求增加，依家發改委就容許煤企增產。

煤股睇勢仲未升夠

麥格理發表報告，預計秦皇島煤價仍有上升空間，上調三大煤股目標價，首選則為中煤能源（01898），目標睇5.55元。睇番走勢，其實中煤已離52周高位4.58元不遠。

石油股有冇力再上，要睇油價走勢同各國行動，鋼鐵股喺內房繼續調控之下或受拖累，煤炭股相對上不明朗因素較少，資源類股中應先揀煤炭股。

古勝