北水頭等倉:中芯逐步收集等「升呢」

北水暫停南來,炒家冇嘢好炒,就翻炒估值貼地的油服股,巨濤海洋(03303)、華油能源(01251)、安東油田服務(03337)、百勤油服(02178)、TSC集團(00206)均成功在淡市突圍,但真係鹹魚翻生,抑或純粹冇嘢好炒短走一轉,相信最快今日下晝就有答案,跟炒宜打捉十二分精神,見好要收!

一如所料,中國恒大(03333)復牌股價高開,全日高位見5.87元,表現在預期之內。若然單刁順利完成,恒大應該唔止呢個價。

不過,其他內房股未有受惠恒大升勢,皆因超有超過十個城市實施打壓抑樓市過熱的調控措施,中國海外(00688)及華潤置地(01109)股價均偏軟。但說到底,呢兩隻先至係實力內房股,中海短線不妨留意在250日線24.8元的承接,潤地支持位則在20元關,相信盤整過後會有反彈行情。

深港通下月開通,據講香港證監會上月批出二十一張資產管理牌照。北水已成為港股的希望,嚴格而言港股經已轉咗莊,由華資及外資手轉至阿爺手。私募基金大規模投資港股,當以國際優質股或低殘的內地品牌股為首選。

合股後啱基金心水

中芯國際(00981)自○四年上市以來,冇咩大作為,近幾年公司擺平與台積電的矛盾,並委任新高管後,股價同業績都有番啲起色。早前公司宣布十股合一股,將於十一月二十一日除淨。合股之後,中芯股價變為基金熱選的「一美元」樓上股份,由股仔升呢至基金股,呢個轉變不可不察。

事實上,中央政府重視創新科技發展,中芯的背景具戰略地位,早前國家集成電路基金向中芯北方注資就是一個例子。見到今年以來滬港通經紀牌6999頻頻買賣此股,再加上業務發展及合股活動,有理由相信,呢隻股有機會脫胎換骨,長線現水平收集尚未算遲。

司慕渢