孖妹S檔案：十月股災劫十個親身教訓

講十月，你諗起乜？孖妹身處魚缸最前線，又點會因為多咗嗰兩日公眾假期就沖昏頭腦呢？股壇史上三大劫數都係十月出現，一眾金融人回想過往曾經出現嘅腥風血雨，簡直係聞風色變！今次孖妹搵咗10位金融人加魚缸友吹吹風，原來佢哋一人有一個十月股災的故事……

瑞銀亞洲股票衍生產品銷售部董事總經理于正人

輪證界：投資者瘋炒牛熊證

瑞銀亞洲股票衍生產品銷售部董事總經理于正人（Johnny）：「最記得○八年十月股災對輪場好大影響，因為個市好波動，跌得好犀利，所以窩輪場外引伸波幅升得好交關，無論Call輪同Put輪都變得好貴，普遍嚟講係百分之廿幾，當時係飆到百分之八十幾，令到有效槓桿好低，去到一、兩倍，所以搞到投資者冇肉食，當時因為牛熊證有效槓桿高，即使有收回風險都好，所以大跌後兩個月啲炒開衍生工具嘅人就走晒去炒牛熊證。」

證券界：海嘯走唔切輸200萬

興證國際證券客戶投資組副總裁盧駿匡（Chris）：「九七年雖然我有炒股，但都遠不及○八年多，因為海嘯前我賣物業炒股，做全職炒家。當時喺牛市三期，見股神巴菲特喺11至14元沽出中國石油股份（00857），我仲覺得佢睇錯市，所以再入貨，冇耐就摸頂，最慘係重倉中國人壽（02628）同中石油等，冇將資金抽走，喺海嘯時走避不及，輸咗200萬，後來我鑽研技術分析，喺一二年追平條數，仲有賺添。」

證券界：股災訓練危機意識

訊匯證券行政總裁沈振盈（Louie）：「我最深印象係八七股災，當時啱啱讀完書入行，乜都唔識，對股市係初學階段，信晒基本面分析、用理論計數，突然股災自己都預料唔到。雖然自己剛入行做Trainee都冇乜入市，不過認真感受良多，見到班散戶日日賺錢去到一鋪清袋。最慘係用孖展炒，冧市一、兩日已由幾千萬倉變成倒輸幾千萬，呢役訓練到我危機意識，避過其後發生嘅股災。嗱，如果見到銀行有散戶爭機撳股價，爭到打交，就應該係升市尾聲。」

興證國際證券客戶投資組副總裁盧駿匡

訊匯證券行政總裁沈振盈

理財顧問界：跌市後反彈忌接貨

浩邦金融董事梁彥穎（Ernest）：「八七、九七、○八年股災我都經歷過，八七年小試牛刀就唔好提，其後兩役我都走得甩，主因係典型股災格局，留意到股市Keep住多月不停上升，唔會跌穿20日平均線，去到高位時市盈率已唔合理，而且又睇到港股同美股齊創新高嘅現象。金融風暴前，公司仲有時間發信警惕所有客戶，最多人中招唔係股市頂位，大跌市後嘅短暫反彈浪先最多人接貨揩嘢！今年美股見高位，香港就處於今年高位，我自己會保守啲，投資者不妨加入認沽期權做對沖。」

理財顧問界：券行執笠無辜輸錢

美國萬利理財亞太區總裁張佩儀（Denise）：「對我影響最大係九七金融風暴，當時我揸住市值四、五十萬元嘅滙豐控股（00005），點知證券行執笠，即使我冇做孖展都好，都成筆錢冇晒，對初出嚟做嘢冇耐嘅我嚟講真係好大考驗！最終搞咗一大輪只可以賠到15萬元，所以投資股票安全性好緊要，呢次之後，我只會喺銀行做交易，亦都唔會咁大手買單一個股。」

浩邦金融董事梁彥穎

美國萬利理財亞太區總裁張佩儀

財經網誌界：借孖展中伏即斬纜

偉哥投資手札筆者偉哥：「九七年我仲係學生，炒股冇耐，用學生貸款同家人資金去炒，當時正值國企紅籌熱、市場專追注資概念股及殼股，完全係資金市，跟風炒，金融風暴一下子冚埋嚟，搞到人踩人，而我又借孖展，中伏就只好即時Cut晒佢，輸咗十幾萬。後來，○八年有晒經驗，早早喺未到三萬點已撤退，避開大劫，不過，最衰估唔到海嘯後遺症咁大，喺跌至兩萬點就過早撈貨，好在只持有基本面好嘅股份，所以○九年好快就賺番晒！現時港股估值唔貴，喺亞洲屬低水平，暫時見唔到有危機。」

傲揚集團投資總監尹滿華

芬佬界：見百富勤執笠心寒

傲揚集團投資總監尹滿華（Lewis）：「最令我感慨係金融風暴，當時我入會計師行做審計冇耐，第一份工就見證住百富勤執笠，我係首批入公司做清算嘅人員，行入公司就見到一地文件同廢紙，空無一人，但明明間公司以前盛極一時，多間富豪旗艦都係佢客戶，竟然因為佢投資嘅印尼債券價格暴跌而倒閉，真係令人好唏噓！依家香港唔存在股災條件，加上樓市槓桿比率低，持貨者實力強，唔似九七年。」

魚缸界：藍籌都輸散戶灰爆

致富證券灣仔分行經理梁健基：「我自己就一一年先入行，未入行前我都聽過有散戶因為○八年喺高位入咗貨，足足坐咗幾年先回到本。諗番轉頭，我印象最深刻係見住有客人拎一、二百萬嚟開戶口，由完全唔識玩，到輸到人間蒸發，都只係一年嘅事。另外，好多散戶喺大時代嗰時，見個勢好就愈買愈多貨，高追都唔怕，可惜大時代後，股市一直插，就算係大藍籌，都蝕得好厲害，見到好多散戶都『灰爆』，識得及時止蝕真係好重要。」

魚缸界：恒指極速蒸發三分二

輝立証券（香港）旺角分行經理譚思聰：「諗番起○八年，真係由天堂跌落地獄啊！恒指由近32,000點跌到得番約11,000點，蒸發咗成三分之二啊！曾經輝煌嘅時候，即係○七年嗰時，真係買乜升乜，開心到要放煙花！去到○八年我最深刻印象係有日恒指跌到11,000點，我同散戶都呆晒，差唔多冇人再敢入貨，斬倉止蝕就有。嗰排人人都坐唔安，食唔落。我仲記得，嗰陣中國人壽（02628）成50蚊，大把人摸頂，到依家都未埋岸啊！」