Market Insight：水泥股有反攻條件

回頭睇番，六月底最初升浪由騰訊控股（00700）、滙豐控股（00005），加埋濠賭股帶動，之後輪到內銀股接力，到上星期炒石油輸出國組織（OPEC）意外減產，最後一擊由大落後的三桶油發威，由強勢炒到落後股，十足十股市傳統升浪，由大藍籌炒到垃圾股跟手玩完，玩法如出一轍。

上周五，恒指插低442點收23,297點，日線圖上，中期三頂的頸線23,276點一度失守，即使破位唔插，市況動力減弱幾無懸念，啱啱遇着剛剛，德銀驚魂過後，上周五晚本港藍籌在美國ADR市場反彈，恒指夜期亦有252點進帳，捱打的股友無不熱切期待今朝大市重開。

德銀傳聞 空穴來風

講番德銀危機，講到好似雷曼翻版一般，作為歐盟經濟龍頭德國的最大商業銀行，四個字講晒：TBTF（大到不能倒，Too big to fail），並非在下隨口噏，德銀事實係G20設立的金融穩定委員會，位列二○一五年TBTF名單內，德國點可能睇住佢死，睇嚟周五傳美國罰款有數講，仲要打過三八折，不似是空穴來風。

近排見到唔少憂慮德銀被罰之外，兼且重提德銀手上的天量可換股債（CoCo bonds），是今次危機元兇，可換股債在銀行資本跌到低於一定水平，銀行可以將債券硬性轉為銀行普通股。

到底講的靠嚇，抑或聽那個唔識，近年銀行發可換股債成風，無非為巴塞爾新資本協定，唔能夠再發傳統永續債券，轉為有條件計入一級資本帳的可換股債，以換取較高的資本要求，你話銀行會唔會真係逼到無路行，去所發可換股債變成普通股？

無錯，佢哋有呢個選項，不過先例一開，唔單止銀行未來發債成本大幅提高，其他環球銀行所累積發行的可換股債，勢必成為恐慌性拋售對象，引發新一輪金融災難，仲唔明？即係就算特朗普做咗美國總統，手執核武密碼，隨時可以向世界每一個角落發動攻擊，但掣一按，牽一髮動全身，後果會無法想像，德銀是否去到唔用唔得，睇現時環境，古勝的答案肯定係：「No」。

內地樓市有幾旺，之前已經略略提過，加埋中央大搞基建，建築相關行業受帶動。鋼鐵、水泥價格近幾個月有所回升，據統計，首八個月水泥行業實現總利潤185億元人仔，按年增長18%，八月份則按月增長17%。似乎經過一段低迷時期，終出現一線曙光。

早前有報道指，中國水泥協會向有關部門提交咗大企業產能互換建議，到「十三五」末，全國前十大水泥集團產能集中度將超過60%（目前約為54%），並透過重組方式達到目標。就咁睇，大企業將會成為得益者。

金隅反覆挑戰高位

下半年係水泥行業旺季，目前唔少地區都上調水泥同熟料價格，企業經營情況開始有改善。龍頭股安徽海螺水泥（00914）及華潤水泥控股（01313）股價亦由六月中反彈，至今累升26%及40%。前者支持位喺20元，若守穩其上，後市有望再試23元；後者近兩個月喺2.9至3.3元之間整固，且看是否有力突破阻力。

另外不妨留意下金隅股份（02009），上周初股價跌至大約2.8元，徘徊幾日之後，周五逆市升3.4%，收報2.98元，惟收市未能收復20日及50日線，不過喺成交配合下，要重上此兩條平均線應唔難，後市將反覆挑戰3.24元阻力。

古勝