絲絲講場：雅各臣上市藥丸喇叭搶耳

事關尋日朝頭早，雅各臣科研製藥（02633）上市拎咗一盒巨型保濟丸嚟送畀香港交易所（00388）做上市紀念品，正當絲絲以為佢淨係得個殼嗰陣，主席、執行董事兼行政總裁岑廣業就話「打開個盒啦！」

原來內有乾坤，真係有一大樽裝住幾十粒好似乒乓波咁大嘅保濟丸（當然唔係真係食得嗰啲啦），全場即刻起哄，仲一齊舉起手機影相添！就喺呢個時候，會場仲播出保濟丸嘅廣告歌，真係好應景呀！

12倍大模型變小景點

絲絲聽講呢樽Mega Size保濟丸係根據實物1比12做出嚟，你咪以為佢只係單純一個模型，其實佢係一個藍牙喇叭，樽底仲有一個揚聲器，只要接駁電話就可以播出音樂啦，認真不得了！上市儀式完咗之後佢仲成為一個小景點，大家都爭住同佢影相，絲絲相信呢樽保濟丸藍牙喇叭如果推出市場，一定大受歡迎啊！

抽升12% 一手帳賺360元

雅各臣尋日高開5.33%，仲彈上1.65元水平。雖然之後股價回軟，在1.6元水平上落，但尾市有追盤，再度飆上全日高位1.69元，收報1.68元，較招股價1.5元高12%，唔計手續費，一手帳賺360元。

余絲韻