絲絲講場：滙豐一姐揭150年機密
獅子行滙豐已經喺香港扎根150周年，收埋咗好多珍貴歷史文物與檔案，有啲未曾公開過。佢哋喺奧運站嘅檔案部舊年四月完成翻新，尋日滙豐香港一姐，即係滙豐香港區行政總裁施穎茵（Diana）首次帶傳媒參觀呢個滙豐歷史檔案部。
檔案部藏逾200奇珍
檔案部展覽館面積約2,000呎，有超過200件實體展品，包括信件、舊照、經典錢罌、初代信用卡，連1864年董事會首本會議紀錄都有；而利用電子方式收藏嘅展品超過250件。
唔講唔知，滙豐旺角旗艦分行原來好旺大班。呢間分行有香港第二總行之稱，1948年開業，當年香港工業起飛，一間旺角分行嘅收入已經多過滙豐喺某啲國家嘅總收入！呢間分行仲孕育出唔少大班，包括前主席浦偉士、艾爾敦等猛人。Diana雖然無做過旺角分行，但亦好有淵源，佢十幾年前負責將呢間分行翻新成旗艦店，之後職位愈升愈高。不過Diana自己最有感情嘅，可能係中環總行，事關佢細時經常喺嗰度等滙豐做嘢嘅媽咪收工！
你都想見識吓？檔案部展館暫時只開放畀員工、學術界同部分學校預約參觀。想睇多啲？可以上hk.on.cc/hk/finance「東網財經」睇，多圖。
余絲韻