Market Insight：收租股唔怕儲定貨

八月美國非農新增就業職位15.1萬個，唔算好差，卻不及大行估計的18萬，美國即時加息的壓力紓緩，美股及港股夜期再升，股市玩家為歎多陣「超低息」雀躍。

話說回頭，舊年底倫媽宣布首次加息後，講到鬼咁大話今年可加四次。結果點？拖吓拖吓，眨眼得番九、十一及十二月三次議息會，由倫媽成日提供未來息口去向，依循「數據主導」，表面是聯儲局睇餸食飯，衰啲講，根本佢自己睇唔通，唔想做千古罪人，結果拖到天荒地老，個龍門搬來搬去，股市及美國樓市泡沫愈吹愈漲。

低息環境追逐回報

姑勿論點，短期美息不明朗因素暫且打住，港股夜期已經升爆，在外圍強勢加埋北水南來狂掃高息股之下，港股返到兩萬四水平，似乎唔係無可能。低息環境得以延續，近期港樓市升勢愈來愈誇張，上周樓價指數急升2.31%創六年最大一周升幅，香港樓市返到三十六周高位，銀行在工商業貸款需求不足下，亦返到樓按大打爭奪戰，H按減息戰一觸即發。

近日港人港地一房賣到貼近五球，真係唔好再問今次資產泡沫咁落去點收科，因為古勝手上無預知未來的水晶球，現實係樓市高位回落唔夠兩成已拗腰，再一次證明人人睇跌之時，跌市往往唔會發生。近期聽講內地基金南來，都唔理三七廿一，凡有yield都當買債一樣起勢掃，REITs之外，收租股恒隆地產（00101）同希慎（00014）息率都仲有4.2厘及3.6厘，啱心水可以諗吓。

發改委話要加強監管地方天然氣輸配價格，簡單講即係收費過高就要下調，不合理收費就要取消。其實舊年十一月亦下調過非居民用氣價，每立方米減0.7元人仔，目的都係刺激天然氣需求、減輕企業用戶負擔、降低工業生產成本及改善空氣質素，推動「煤改氣」都需要誘因。

去年價格調整的影響，對燃氣企業的收入有一定影響，例如華潤燃氣（01193）中期收入按年微跌近1%，與氣價下調及匯兌虧損有關；濱海投資（02886）就指上半年平均氣價按年下跌22%。

燃氣股有政策因素

市場分析，今次推出的新規，對大型企業嚟講影響會較大。消息一出，上周四多隻燃氣股下跌，中國燃氣（00384）及港華燃氣（01083）分別跌10%及6.9%。

美銀美林亦發表報告，考慮埋早前出台的中游輸氣管道關稅及重整企業資本回報率等措施，下調咗幾隻燃氣股的目標價，當中以北京控股（00392）及新奧能源（02688）目標價削減幅度最大，兩股當日均跌大約一成。而上周五則見普遍股份小幅反彈，事實上，使用潔淨能源係大勢所趨，對天然氣需求應有增無減，長遠仍會利好相關企業。

古勝