絲絲講場：唔靠父幹 學生搵領展圓夢
唔想靠父幹就搵領展（00823）？冇錯，但首先你要有能力、有潛質、仲要係屋企三代中第一個考到入大學。
獲資助兩萬 赴美參賽
領展舊年起搞咗個「第一代大學生獎學金」，獎勵父母及祖父母都冇大學學位、但啱啱考到入大學嘅同學仔。上年就獎勵咗100個升讀大學嘅同學仔，每人可獲兩萬元。
呢兩萬蚊係任由得獎者點使，但每個同學背後都有努力小故事，舊年其中一位得獎者係考入科大嘅鄺澤偉同學，佢用呢筆獎學金幫補學費，佢仲有份去美國參加遙控飛機設計及裝嵌比賽，喺80間大學入面奪得第24名。
點申請？Sorry，今年已截止，但明年三月起，考DSE同學可經讀緊嘅中學推薦同填表，入圍嘅話通常九月面試。各位同學快啲Mark低！
余絲韻