孖妹S檔案：A股小炒王食胡 靠搭通天地線

天天：八十後散戶 天天

查股權 揀重組概念

身為八十後嘅天天自小同家人分隔中港兩地，喺內地長大，熟悉內地股市，佢3年前嚟香港發展，今年頭上車置業，仲娶到「白富美」老婆，部分買樓首期都係多得幾隻爆升A股帶挈。

彩兒：你出身金融系，以前喺內地又做過金融，唔怪得會炒A股啦！

天天：係呀，我覺得深圳A股同港股市場差距真係好大，炒深A股要靠好多消息，唔可以單靠基本面（口架）；反而，港股市場相對透明度高，公司背景資料同財務報告都比較可靠……炒A股嘅話，你背後嘅人脈資源就好緊要喇，你要睇清楚公司背後嘅主要投資者係乜人，要留意影響股價嘅小道消息，例如會唔會下季有資金注入公司呢？

慎防資金隨時鎖死

Kitty：嘩，你講就易啫，即係要識得人多先得啦，仲有乜揀股貼士先？

天天：咁聽完消息都要揀公司嘅，睇財務報告、睇番上年業績就唔少得啦，仲要Check清楚公司背景、睇吓股權分布，我比較鍾意國企股，特別係一啲有重組概念嘅公司，注入新業務就係一種催化劑。

我記得特別深刻嘅係，上年大時代買入一隻有重組概念嘅股份，原本公司係做地產，後來加入醫療業務，我喺約8元（人民幣‧下同）買入，後來兩周內升到上12元，帳面賺幅約五成，當時我先將一半股份沽出套現獲利，但當時衰貪心，覺得會繼續升，所以另一半繼續持有，可惜第二日就股災，啲貨都被迫短炒變長揸，揸到依家仲未返家鄉。

彩兒：好彩你走得切部分貨，年頭先有機會買樓咋！咁深A股仲有冇啲「鬼祟位」係要特別留意？

天天：上年大時代後嘅股災，我試過手上持股連續一星期都跌停板，一開市就跌停，完全冇機會出貨，真係好無奈，我仲見到身邊好多朋友因為咁破產！所以炒A股要有資金被鎖死嘅預算。

跟大戶玩至係王道

另方面，A股講得好聽就係波幅大，講穿咗就係賭性強，留意內地著名基金經理入乜貨，跟大戶玩先係王道，或者可以將風險降低；若自己搵啲優質股出嚟價值投資，盤數無論幾靚都冇用！基本面就只係「最基本」，我後來先知唔可以盲從。

P：全職炒家 Pasu

瘋炒概念 機會所在

Pasu成為全職炒家前，喺內地打理家族生意多年，熟悉國情，3年前炒埋A股，務求賺盡北水。

Kitty：你係全職炒家，又點會冇炒開深圳A股吖！

P：我3年前已開始炒深A股（口架）喇，記得一買入樂視網（300104.SZ），帳面賺少少，佢就即刻停牌逾2個月搞重組，搞到責死資金，仲要一復牌就升停板幾日，我未回到神，佢就急回調，點知好消息一出就轉勢，搞到我要即時沽貨，好彩有微利！

另外，我以前都有炒過天齊鋰業（002466.SZ），佢係環球生產鋰嘅企業龍頭，鋰係用嚟生產電動車，即使外資買唔到都好，外國金融討論區都會討論呢隻股票。佢估值高，回調緊，現時係我監察名單之中。

彩兒：好多人話，炒A股要靠消息，你點做功課？

P：雖然深圳A股市盈率高過上海A股好多，前者郁啲都40至50倍，甚至過百倍市盈率，後者就只係十幾倍市盈率，不過慘在股價唔郁呢……所以，我覺得投資機會主要聚焦深市，主因熱錢多、投資講概念同故事。

（目及）實北水流入股份

A股同港股嘅操作方法好唔同，波動性、投資者反應，以及股份走勢節奏都極之唔同。一啲天方夜譚故事、公司只係擦邊食到概念，都竟然可被炒至爆升，好難捕捉市場韻律。無錯，炒A股係靠消息，但靠上網睇新聞係唔掂，入門者可以睇多啲內地投資討論區，或者關注付費媒體，例如雪球、大智慧及同花順等。

Kitty：咁你最近有乜好路數？

P：我留意到，滬港通北向資金眼光準繩度幾高，一旦深港通通車，都可以留意港交所（00388）每日公布北向資金流入嘅股份，從中尋寶。

我八月頭買入深圳機場（000089.SZ），現時微賺，買入主因深圳高速發展，當地係眾多具有領導地位嘅科技企業基地，深圳客運量增長快速，暫時泊錢入去，同步物色其他潛力股。

《Pokémon GO》推出令任天堂股價曾爆升，我就搵概念股，其中一隻係移動遊戲開發商掌趣科技（300315.SZ），早前買入博佢會受惠爆升，且內地相關開發商亦容易複製《Pokémon GO》遊戲模式，不過，近月A股市場走資，成交薄弱，我持倉都有微蝕，一旦蝕15%就會止蝕走人。

T：股票經紀 Thomas

價值投資 吼實力股

Thomas曾經係大學語文導師，又做過全職炒家，因應對股票有濃厚興趣，仲做埋股票經紀添，佢喺3年前開始透過內地親戚股票戶口炒A股，即使係隔山打牛，但成績都飲得杯落。

宜選龍頭高科技企

彩兒：你係價值投資法粉絲，呢套喺A股仲Work咩？

T：其實，無論係滬A股或者深A股都有唔少實力股，不過，有趣在於內地市場細價股估值貴，有實力嘅反而唔貴，好似五糧液（000858.SZ）咁，佢預測市盈率只係約16倍，一啲都唔貴，隨住佢今年初走出低谷，公司品牌仲係國寶級，走勢又唔錯，所以真係值得吼！

Kitty：深圳股場有乜吸引力？

T：深圳股市有眾多高科技企業嘅選擇，係香港所缺少嘅，部分唔係世界級，都係內地行業龍頭，例如大族激光（002008.SZ）同埋海康威視（002415.SZ），都係我嘅心水股。

至於前者，我近期又開始留意番，佢係高新技術企業，近一、兩個月走勢慢慢磨，仍然得個「睇」字；至於後者，我早喺一四年底至一五年五月多次炒波幅，賺幅有約兩成，近期因為覺得滬綜指有鐵底支持，加上覺得佢喺深港通開通後勢吸引外資，所以買入博一博。

其實，喺一四年底至一五年五月，我都靠格力電器（000651.SZ）食過唔少次胡，上年沽出五成股份，賺幅有三成，另外五成股份，就因為佢停牌多月而持有至今，呢間公司研發能力極強，亦好欣賞董事長董明珠嘅能力，所以睇好佢長線發展。

彩兒 Kitty 若有料報畀彩兒同Kitty或有嘢問，可電郵money.biz@on.cc