八月至今港股走勢令人喜出望外，深港通四個月後擇日開通的消息，暫時未見引發太大幅度的獲利回吐。不過，別忘記近月股市不斷上升期間，宏觀數據未見起色之餘且在惡化中，提防大市最多頂埋今個禮拜，下周期指結算後又再走樣！
騰訊（00700）呢浪升得幾急，短線持貨建議趁高食胡袋袋平安，相信年底前仲會有執平貨機會。其實，唔知大家有冇留意，阿爺今次話四個月後會擇日開通深港通，但如今尚未知邊日，到底搞咁耐為咩？相信目的只有一個，就係留張牌為港股「保底」，皆因十一月美國總統大選前後，預咗環球股市好可能大波動，屆時深港通至少可以為中央維穩兩地股市增添籌碼。
環顧一眾中資板塊，不少近月都錄得一定升幅，就連內銀股在業績前都有進帳，唯獨電力股仍舊弱勢。
事實上，內地經濟數據未見起色，無論是工業抑或民用電力需求都受壓，加上來自新能源的競爭，造成電力供應過剩，電企毛利率及設備平均使用小時相信尚未見底，估值持續受壓自必有因。
不過，筆者相信，唔使等到經濟真係見底，電力股先至會翻身。暫看下半年電力股仲有機會再破底，但亦係最值得留意抄底機會的中資股板塊。只係講得抄底，冇人知幾時先至係真正底部，實際操作只能在技術指標出現極度超賣時分注收集。相對強勢之選是華潤電力（00836）、論估值較吸引則可揀華電國際（01071）。
司慕渢