Market Insight：內房股強勢有原因

中港經濟在可見的中短期內，一團糟的局面未見改變。股聖科斯托蘭尼講過，股市與經濟就好似主人與小狗散步，長遠的目的地一致，但小狗（或股市）短期可以來來回回，同主人（經濟）步伐不同步。近日唔少分析認為，英歐分手下全球央行放水預期，加上業績期炒得八八九九，大市短期勢將進入整固期。

常言道升市莫估頂，與其日日驚個市跌，倉底空空如也的錯失機會，不如諗吓有乜股票即使在市況調整，還是可以逆市而行。上周上海賣地連環出現新地王，二線內房股繼續威威，碧桂園（02007）升4.4%，越秀地產（00123）升2.6%，龍湖（00960）升2.1%，一線城市大把項目的龍頭股中國海外（00688）及華潤置地（01109）均升0.9%。

唔少人擔心，內地陸續收緊對一線城市樓市的寬鬆手碗，會令樓價及內房股進入調整期，但觀乎發展商投地的凶猛及內地房捧場客的熱情，已看到內地經濟面前的困局，在放任GDP增長下半年進一步收縮，睇住樓市炒到爆，兩害取其輕下會點樣決擇。

IGG有力突圍而出

深港通對港股的刺激作用，似乎僅限於恒指小型股指數市值過50億元，夠秤畀內地炒家垂青的股票。近排在這百多隻準新貴中，古勝睇啱隻手遊股IGG（00799）。

近排美國科技股牛氣沖天，本地龍頭騰訊（00700）的股價亦已企住200元樓上，十幾倍PE的IGG，手頭現金差不多是啱啱夠50億元市值的三分一，上周IGG衝上3.79元後橫行待變，睇形勢贏面大輸面細，可以留意。

三大中資電訊商舊年下半年開始實施提速降費，加上4G上客量有所放緩，令盈利受壓。中移（00941）及聯通（00728）已公布咗中期業績，中移多賺5.6%，收入增長7%，當中流量收入首次成為最大收入來源，而ARPU升至62元人仔。

依家基本上大家都係用手機上網，睇新聞、睇劇、上社交平台等，有咗唔同通訊App之後，更加連打電話都少，仲可以取代埋長途電話功能，連身處地球唔同地方都可以隨時聯繫，數據業務成為新的增長引擎，中移喺業績報告提到，手機上網流量按年增長1.3倍，無線上網業務收入增長近四成。

中移可再做紅底股

至於聯通，上半年收入按年跌3%，不過同舊年下半年比較則有6%增長，純利大幅倒退近八成。集團同時公布七月份營運數據，4G用戶淨增542.1萬戶，上客速度較六月加快。多間大行都認為其最壞時間已過去，盈利下半年將有改善。

由於電訊營運商的收入較為穩定，當中以中移的盈利能力最高，目前其股價在高位整固，在下之前提過佢有勢挑戰百元關，家陣目標未變。

古勝