絲絲講場：單親媽如何煉成保險強媽？
嗰時佢好幸福，有個圓滿家庭，老公疼錫。就當一家期待住新生命嚟臨，老公不幸離世……結果佢由一個百般依賴嘅小女人，蛻變成今日嘅保險強媽，佢囝囝更加成為佢Sell單嘅「幕後軍師」！佢係友邦（01299）財富管理及保障經理梁卓華（Amy）。
話說廿年前，喺廣州做中文老師嘅Amy，自己一個離鄉別井來港，邊做文員邊讀書，仲識咗摯愛嘅老公。佢哋拍拖、結婚、誕下愛情結晶，原本以為幸福可以一直延續落去，點知老公突然過身，留低五歲囝囝同Amy，Amy仲佗住細仔。
「嗰陣好徬徨，好似咩都冇晒。」老公離世對Amy極大打擊，最低潮時，得老公份壽險賠償金幫助，三母子嘅生活壓力先得以紓緩。細仔出世後，Amy身兼父職湊住兩個仔，兩年前Amy決定做保險代理。
囝囝度橋教Sell客
Amy一路學一路做，入行一年已達到「百萬圓桌會」（MDRT，年佣金約50萬元），今年只過咗一半，已距離第二個MDRT唔遠。但佢最開心嘅係，三母子關係變得更親密。大仔體貼阿媽工作辛苦，製作Powerpoint畀阿媽見客用，又幫阿媽度橋說服個客，「佢叫我同個客講，有個小朋友喺公園盪鞦韆，突然唔小心跌咗落嚟，冇買保險就點點點……」舊年MDRT嘅典禮，呢位幕後軍師都有出席，見證住阿媽「成才」嘅一刻。
余絲韻