絲絲講場：學足股神7貼士掂硬！

絲絲建議大家將呢7個貼士儲起，見唔對路時，將佢三碗水煲埋一碗服用，應該幫到吓。

1 要有自己嘅內在標準

當自己內在標準與世間睇法有出入時，點抉擇？唔好因外界批評而輕易動搖，股神話嘅。

2 假設一生得20次機會

咁你先會珍惜、先會諗清楚、先會盡全力。

3 去最欣賞嘅公司工作

搵工唔好齋睇公司規模或錢，揀自己最欣賞嘅公司、為最佩服嘅人做嘢。

4 每日「賣」一個鐘畀自己

巴菲特副手芒格當年仲係個律師仔時，佢一個鐘可賺20美元，但佢決定每日「賣」一個鐘畀自己，用嚟自己買賣房地產。你都可以留起呢粒鐘用嚟自我增值，投資自己係回報最好嘅長期投資。

5 成世記得Keep住睇書

閱讀助你終身自學，股神巴菲特今時今日仍然日日攞書嚟睇。

6 抄成功者10%最好習慣

見到欣賞嘅人，就照抄佢哋最好嗰10%好習慣；見到啲唔掂嘅人，就提醒自己去戒一樣有嗰最差10%壞習慣。

7 要好好照顧自己身體

只有自己身體是會陪自己一世。其實你依家對佢做嘅每一樣嘢都影響住你之後嘅幾十年，唔好到時後悔。

余絲韻