絲絲講場：Apple三星隨時又鬥法

三星同蘋果公司（Apple Inc.）早已鬥到上法庭。雙方喺美國嘅專利官司打咗好幾年，三星一二年時輸咗，被指侵犯Apple幾個iPhone專利要賠10.5億美元，三星依家上訴緊個賠額，周三即有過百位殿堂級設計師及學者聯署向法院交意見力撐Apple！

呢班設計「神人」包括設計香港機楊同香港滙豐總部嘅建築師霍朗明（Norman Foster）、兩大時裝設計師Paul Smith與Calvin Klein，以及珠寶品牌Georg Jensen與賓利汽車嘅高層！佢哋認為如果畀三星贏，會嚴重降低設計嘅價值。

至於三星一樣有人撐。Google、facebook咁認為法院之前喺專利法解讀上偏袒Apple，阻礙創新。

iPhone邊個抄邊個呢場審死官都未完，下個官司新戰場可能係智能手錶，外電係咁講。事關美國專利商標局啱啱呢個周四刊出咗三星申請嘅「Wearable Device」設計專利，有圖有真相，你自己睇。遲吓會唔會有人拗Apple Watch係邊個原創呢可！

講到智能手錶嘅市佔率，Apple Watch係一哥佔咗72%，三星佔7%就排第二。絲絲覺得係時候買定花生，擔定櫈仔睇戲。

余絲韻