北水頭等倉：電力股博食鋪尾胡
港股昨日因八號風球高高掛休市，A股大部分時間都係牛牛皮皮，到尾市才拉升，滬綜指收報2,971點，升17點。澳洲央行一如預期又再減息，而日本內閣亦已通過28萬億日圓刺激經濟方案。正所謂「人在江湖，身不由己」，睇來呢兩季人民銀行好可能要再減息降準。
最近唔少中資金融股都發盈警，事關去年次季比較基數甚高，故發盈警其實並不「驚訝」，投資者毋須作過度解讀。講到業績，低油價之下，「三桶油」的業績唔見得人，又係預期之內。最近見到中海油集團旗下五家上市公司──中海油（00883）、中海石油化學（03983）、中海油服（02883），以及A股上市的山東海化及海油工程，其中四家已發盈警。
弱勢股照樣可贏錢
在低油價之下，中海油系公司如何經營下去，確令股東憂心，特別是其國際化進度比其餘兩桶油為快，且集中做上游，受低油價的影響較大。故在板塊處於弱勢時，中海油股價表現會係最弱的一員。但正因為股價與油價敏感度相對高，當油價反彈，其股價反彈幅度亦會較其餘兩桶油大，故適當的投資策略，亦能在弱勢股中賺錢。
中資電力股方面，睇見今年上半年的製造PMI數據，大概都估到工業用電量唔會好得去邊。故見電力股股價延續自去年中的跌勢，繼續尋底。
之不過，筆者相信，中資電力股有望在第三季見底，皆因預期下半年內地有機會再減息降準，而從七月份的經濟數據可見，製造業開始見到回穩迹象，若八、九月持續改善，料趨勢可率先於電力股估值中反映。
再看龍頭股華能國際（00902），上月股價兩次成功守穩4.4元水平支持，14日RSI呈背馳，每逢回試4.5元或樓下水平可考慮分注收集，博衰家食尾胡。
司慕渢