打風停市，港交所（00388）總裁李小加仲忙？睇嚟忙住寫Blog。深、港只係隔條河，何解打風香港呢邊要停市，深圳唔使停先？小加尋日就喺佢個網誌度，搞咗場「深港矛盾」討論。
小加話打風難得可以瞓吓，點知10點鐘就畀手機微信嘈醒。原來班Friend熱烈討論，勁過開港交所董事會Brainstorm，話上晝仲掛緊8號波，「力場效應」冇起作用添！（講「力場」？鬼馬！）
來，入正題。「港方Friend」話人命關天，安全最重要；又話香港颱風預警機制有咗百幾年，好成熟；又話政府規定銀行暫停營業、交易所休市、貨櫃停止交收乜乜乜。「深圳Friend」就話下午停市，個市場損失幾咁多；批評香港制度太死板，深圳證券行就唔同，尋日完全照常營運。
呢場「深港矛盾」又提到，兩邊市場根本唔同：內地電子交易化程度高，股民多用手機落盤，就算銀行同證券行唔開門，只要交易所與證券行嘅IT系統正常運作，可以照交易；香港就要依賴證券行同銀行，佢哋唔開，小加想開市都開唔到。（嗱嗱嗱，係咪小加心底話先。）
講咗咁耐，會唔會係小加一人分飾多角？查實，小加係撐開市定停市嘅呢可？
「妮妲」殺到，港股停市，港交所唔係冇損失，因為買賣雙方須各付每宗交易金額0.005%交易費畀交易所，如果根據星期一港股成交額計算，即係交易所因為打風少收大約六百幾萬元。
余絲韻