絲絲講場：艾爾敦卅年學唔識廣東話？
滙豐前主席艾爾敦（David Eldon）唔計母語英文，連阿拉伯語同西班牙文都好得，咁有語言天分，何解佢喺香港前前後後都生活咗30幾年，廣東話今時今日都仲係「有限公司」？
上位快冇時間學
佢咁解畀絲絲知。話說當年一九六八年，David佢加盟中東滙豐銀行，一心諗住長期喺中東工作，第一次被派到香港本來諗住短暫停留，點知一留就5年，之後輾轉變咗長留香港，職位仲愈升愈高，結果喺滙豐上到主席個位，愈來愈忙，亦再無時間學中文。
絲絲好多居港嘅外國Friend都嫌中文難學，喺香港食嘢買嘢用英文暢通無阻，Expat又真係無咩動力學中文嘅。David就係最欣賞香港生活夠方便，不過佢話當初無諗過一住就咁多年，如果唔係當時開始就應該好好學廣東話。
David喺○五年退下滙豐火線後，仍活躍於金融界，依家係八達通非執行主席及身兼數職，近半時間喺外地公幹。
香港先至係屋企
佢仲提到有啲朋友闊別香港十年，再踏足呢度，感覺更深：「香港仍然活力十足，24小時都搵到娛樂，由大牌檔到米芝蓮食府一應俱全。即使身處市區被高樓大廈包圍，唔使幾耐就去到郊區。」呢位滙豐前大班雖然英國出世，蘇格蘭長大，不過佢話香港先係佢個「家」。
余絲韻