絲絲講場：華夏動漫攻VR 玩轉港機舖
仲玩跳舞機、夾公仔？Out喇，機舖即將有新嘢玩！華夏動漫（01566）進軍香港VR市場，將會喺商場同機舖引入VR（虛擬實境）遊戲機。
無需資金 供應器材
華夏動漫主席庄向松話，今次同本地經營遊戲及樂園業務的因諾合作，唔使投入資金，淨係提供VR器材，然後用家每玩一次華夏動漫就會從中分成25%。雙方合作開設的首個體驗館，最快八月會喺香港開幕。
公司計劃未來一年內，港澳兩地會開設約100個遊戲熱點，合共安裝200台VR遊戲設備，而內地依家已經有超過1,000個熱點。
玩啲咩？絲絲尋日喺動漫節攤位率先試咗，有跳傘、過山車、揸車、划艇等，一次過滿足晒幾個願望！聽落好刺激，不過根據絲絲體驗，其實都算係老少咸宜，當然小朋友要有家長陪同喇。
余絲韻