北水頭等倉:上實城開試叩2元關

昨日A股震盪下跌,滬綜指跌1.9%收場,主要係盛傳內地史上最嚴銀行理財業務監管新規即將落地,嚇壞股民。之不過,港股只係反覆上落,恒指升89點收市。

盛傳的銀行理財業務新規,其實早喺一四年曾徵求意見,其後擱置。簡單計就係將銀行業務資產分類管理,分為基礎類及綜合理財類業務;禁止發行分級產品;銀行理財業務進行限制性投資,不得投資於本行信貸資產或本行發行的理財產品,亦不投資貨幣市場基金和債券型基金以外的證券投資基金等。

翻炒重組消息

筆者認為,此做法只是將去年救市前銀行理財產品的亂局撥亂反正,投資者實在不需要感到惶恐,反而為中央下定決心做好市場規範,有利市場長遠健康發展而感到欣慰。

回說個股,早前談及地方國企改革提過隻上海實業(00363),唔爭在又睇吓同系的上實城開(00563),昨日股價做好,收報1.8元,升5.2%。其實早在去年次季已曾傳出資產重組消息,可惜其後大跌市,股價由高位2.8元水平回落至1.1元,都咪話唔傷。

之不過,見今年以來其股價呈反覆回揚,本月初突破1.5水平阻力位後,昨日高位1.82元,乃去年七月以來高位,是否又再次醞釀重組消息,不妨拭目以待。純睇走勢,短線回吐守1.7元樓上,是浪有勢叩2元大關。

司慕渢