絲絲講場：貝索斯身家反超股神
睇番彭博億萬富豪指數，購物網站亞馬遜創辦人貝索斯嘅身家喺星期四升到650.5億美元（約5,073.9億港元），以3,200萬美元之差壓過股神巴菲特，做咗世界第三大富豪。貝索斯身家今年暴漲54億美元，全靠公司嘅快速送貨丶雲端服務丶電子閱讀器Kindle，同聲控家居智能裝置Echo需求強勁，帶動股價水漲船高咋。
亞馬遜帶挈 或挑戰蓋茨
不過，貝索斯嘅身家之所以能夠超越巴菲特，都要多謝巴菲特嘅樂善好施。事緣巴菲特按照每年慣例，喺今個月捐咗價值22億美元（約171億港元）嘅巴郡股份畀蓋茨‧梅林達基金會，所以搞到身家縮咗少少水咁囉。雖然係咁，但巴菲特嘅身家都唔曳，今年財富增長足足有27億美元。
講番貝索斯，佢嘅身家有可能再多啲，皆因有市場研究公司喺五月嘅時候，將亞馬遜股價目標定喺1,000美元，足足比星期四收市嘅744.43美元有成34%上升空間，意味貝索斯嘅身家有可能飆到去860億美元，只係比世界首富嘅蓋茨現時嘅身家低少少咋！
余絲韻