Market Insight：新經濟股選擇吸納

脫歐公投前，恐怕無人估計到英國脫歐的副作用咁鬼正面，環球股市不但睇死美國加唔到息，更預期歐、英、中、日持續大水猛灌，股債市場輪住炒。

上周港股連升五日，累積升1,095點，上周五即市高位21,739點，是一月四日以來最高。大市好耐都未見過咁好氣氛。經歷四至六月恒指在19,500至21,500點水平的上落市之後，今次破位顯然已經逼到一直靠邊站的基金大戶進場。

由上周大市成交慢火煎魚般增加，港匯轉強，上周五見7.7534超過三個月高位，今次個市睇怕唔係虛火咁簡單。

未發市的散戶，真係要好好把握機會，炒息差追高息股的第一浪之後，有樓市復甦故事支持的本地地產股，以及近月銷情持續比大行估計理想的汽車股，都係睇落比較襟炒，比較啱散戶上車的選擇。可以留意的心水，有六月銷情勁爆的吉汽（00175），剛被美銀美林品題的比亞迪（01211）同埋今年靠新型號SUV食胡的長城汽車（02333）。

無美股戶口好蝕底

有番咁上下股齡的股民可能聽過，千禧科網泡沫爆破後有句「high tect揩嘢，low tech撈嘢」的順口溜。不過，今時唔同往日，互聯網與資訊科技股經歷十幾年的沉澱以及淘汰，近幾年跨國基金如果倉底無facebook、Google及亞馬遜一類新經濟股，死都要擁抱舊經濟股，例如銀行股及大型零售股，恐怕唔揩嘢都偷笑。

傳統舊經濟唔掂，新經濟冒起，已是無可抗逆的現實。近排任天堂新手機遊戲《Pokémon GO》在北美推出大熱，直頭有當年推體感遊戲Wii的氣勢，結果踏入七月短短十幾日，在日本股價已狂升九成，創超過六年高。

唔少港人都有用過的日系即市通訊軟件Line，上周到華爾街上市，掛牌首日經已狂升兩成六。

所謂物以類聚，可惜香港資本市場從來都唔係培育資訊科技股好地方，來來去去得一隻騰訊（00700）見得人，反之博雅（00434）、雲遊（00484）及IGG（00799）等遊戲股，上市後無段好睇，要投資科技龍頭，真係焗住捱眼瞓，無美股戶口點都唔得。

太保新業務增長俏

落後板塊輪流炒，內險股上周隨大市向好，連升多日，周五國壽（02628）升1.8%，財險（02328）、平保（02318）及太保（02601）升幅介乎3至4.2%，中國太平（00966）更升逾5%。其中太保近日有大和唱好，預計未來三年其新業務價值及內含價值分別平均有逾25%及雙位數增長，重申「買入」評級，目標價由40元上調至45元。

走勢上，太保股價目前已企喺多條平均線之上，在交投配合下，有望進一步突破250日線28.8元，挑戰30元大關。另外，國壽首六個月原保費收入按年升25%，表現亦不俗，股價在低位橫行多時，終見有起色，若可守穩17.6元樓上，目標先睇19.6元。

古勝