絲絲講場:陳四清:資本市場唔係樂園

博鰲亞洲論壇喺尋日舉行,匯集多個財金界重頭人物,大談一帶一路發展同中國資本開放,當中大家最關注就係中國資本開放之後,阿爺可以直接同外資「Deal」,咁本身作為中外溝通橋樑嘅香港,仲有無碇企。

當港交所(00388)首席中國經濟學家巴曙松想解釋,香港地位點鞏固嗰陣,中行(03988)副董事長兼行長陳四清忍唔住插嘴話,自從上海迪士尼開幕之後,內地人就唔嚟香港玩啦咁話。講呢啲?絲絲個心即場離一離!

好彩,陳四清之後補番句話,資本市場運作唔同樂園,強調香港作為國際金融中心地位無咁易動搖。巴曙松都接住派定心丸,話中國資本市場開放咗,但喺外國交易嗰陣,面對住唔同監管要求同法律仍然要靠香港幫手咁話喎。真的嗎?

余絲韻