絲絲講場：三大行老總撐金管場

金管局為咗配合國家一帶一路大政策，成立基建融資促進辦公室（IFFO），尋日金融各界巨頭雲集嘅場面，絲絲都好耐無見過，連香港三大發鈔行銀行大班都同場站台，仲要前後腳見傳媒唱好呢個新平台。

滙豐銀行副主席兼行政總裁王冬勝（Peter）、渣打香港大中華區行政總裁洪丕正（Ben）同中銀香港總裁岳毅尋日出席完IFFO成立典禮，都滿面春風咁見傳媒。自從中銀香港前總裁和廣北退下火線之後，絲絲都好耐未見過幾位咁獨當一面嘅資深銀行家一齊同場咁熱鬧。

金管局配合國家政策嘅叫座力梗係高。尋日撐場嘅政經嘉賓含金量極高，包括政協副主席陳元、進出口銀行董事長胡曉煉及國開行行長鄭之杰等，真係星光熠熠。

余絲韻