孖妹S檔案：大和賴志文 經濟末日預告
有「新末日博士」之稱嘅大和資本市場亞洲（除日本外）股票研究部首席經濟師賴志文兩年前成功預測人民幣轉勢向下，孖妹最近睇到佢嘅研究報告預測香港目前嘅經濟狀況衰過九七年金融風暴前，真係嚇到個心離一離。適逢英國意外脫歐，環球經濟前景未明，我哋決定搵嚟呢位「大熊人」，解構香港經濟有幾大鑊，同埋分享吓佢嘅經濟預測秘技。
賴：大和資本市場亞洲（除日本外）股票研究部首席經濟師 賴志文
前景預測：美元強勢經濟轉熊
彩兒：英國早前舉行公投，結果係落實脫歐，真係一地眼鏡碎。
Kitty：未有英國脫歐事件前，你已經出報告話香港目前嘅經濟狀況衰過九七年金融風暴前，咁依家咪更加衰？
賴：英國脫歐後，英國經濟如無意外會陷入衰退，需要一段時間重新調整，成個歐洲嘅經濟亦會受影響，增長唔會好，貿易需求自然減少。英國脫歐對香港同內地更加直接嘅影響會喺匯率方面，英鎊同歐元應會經歷結構性嘅貶值，美元轉強，由於港元同美元匯率掛鈎，港元估值過高嘅問題會更嚴重，人民幣近日貶值嘅反應，某程度係唔想畀美元轉強拖住後腿。
彩兒：依家香港經濟望落都幾風平浪靜吖，使唔使睇到咁灰呀？
信貸收縮 冇好日子
賴：如果從成個大環境睇，我哋信貸增長個周期都差唔多行咗十年，中國債務佔GDP 2.6倍差唔多係大家嘅共識，香港嘅銀行信貸佔GDP都超過3倍，中港兩地信貸喺過去十年來暴升，主要係由美元資金帶動，加上同聯儲局極寬鬆嘅貨幣政策有關，貨幣政策吹大咗個泡沫，令我哋覺得過去十年有好可觀嘅增長，帶動到好多大陸對香港零售、旅遊、貿易嘅需求，令失業率偏低。
隨住聯儲局加息，所有嘢都會逆轉，如無意外上年中香港嘅信貸規模已經見咗頂，開始收縮。我哋嘅信貸喺九七、九八年見頂，然後用咗6年時間收縮，期間冇好日子過，間唔中有啲經濟衰退，失業率最高去到8.5%，依家就似當其時嘅環境。
Kitty：嘩，原來風平浪靜嘅表面，已經埋下暗湧！
賴：九七年中嘅時候，淨流入香港嘅資金有240億美元，但截至今年一月底，呢個數高達3,070億美元。呢啲唔係實在嘅錢，係由槓桿製造出嚟嘅錢，有來有回，唔會同你談一世戀愛，拍咗近10年，隨時分手。
彩兒：咁你又點睇嚟自中國嘅風險？
賴：資金淨流入令銀行體系更有能力借錢出去，香港喺九七、九八年借咗好多錢畀周邊嘅東南亞國家，今日就借咗好多錢畀大陸，情況相似。依家內地嘅壞帳有幾高我唔敢想像，人民幣愈貶值，佢哋嘅還錢能力會愈低。
若啲錢還唔到，香港銀行開始受壓，當信貸變壞，外來資金隨時流走，簡單嚟講，最壞嘅情況可以係出現一個銀行危機、流動性錯配。
樓按佔GDP比重超九七
Kitty：過去幾年飆升嘅樓市又會唔會係另一個計時炸彈呢？
彩兒：但亦有唔少人覺得聯儲局加息速度減慢，加上依家啲人實力比較雄厚，香港樓市難大跌喎。
賴：當年九七年房地產泡沫爆破，單單係樓宇按揭借貸就佔咗GDP達36%，依家係高達46%，可見依家啲人買樓唔係有能力，係借貸返嚟。失業率係一個滯後嘅指標，依家仲係只得三點幾個百分點，過多一年半載勞動力市場開始受壓，湧現裁員潮，失業率向上，會影響業主供樓能力。
財策乏力 諗計保本
彩兒：咁香港有冇咩出路？
賴：香港冇咩出路o架喇，一係堅持聯繫匯率，一係就棄守。棄守聯匯可以保住自己嘅基礎貨幣，但風險太大。堅持聯繫匯率就只可靠財政政策刺激經濟，即係搵財爺派多啲錢，但過往都睇到效用不大，只係杯水車薪。
Kitty：面對咁嘅環境，我哋呢啲小市民點算好？
賴：普通市民可以做嘅嘢唔多，自己盡量諗辦法保本啦，睇番九七、九八年發生嘅嘢，從一個事後孔明嘅角度諗吓應該點做啦。
個人心得：同行高估救市成效
彩兒：你睇到香港同內地經濟咁淡，唔怪得咁多人都叫你做「新末日博士」啦，你又點睇呢個稱號？
賴：我唔鍾意呢個稱號喎，「不了情」就話有新、舊啫。我曾幾何時都好牛，好似○九年嗰陣，大家唔記得啫。同埋我嘅觀點係好實在，唔係亂吹。我唔會隨便講啲好熊同虛無縹緲嘅嘢，會好實在咁講經濟環境有咩變化，來自邊度，時間係點，所以我唔係永遠嘅末日博士。末日博士好多時每樣嘢都睇到好淡，而且講十次有九次都錯嘅。
Kitty：一四年三月嗰時你率先預示美元弱勢已完、資金大規模喺內地流走，同埋人民幣會受壓，結果畀你中晒呢三個大趨勢，點解你可以準人咁多？
賴：好多做經濟分析呢行嘅人，睇中國都過分簡單，從來唔覺對外收支平衡表（Balance of Payment）係重要，喺佢哋嘅經濟分析模型入面並冇資金流走呢個因素，只有資金流入，呢個已經係好奇怪嘅現象。
第二係好多我哋呢行嘅人嘅愛國情操都相當高，大部分人都傾向睇好，接近官方口徑，預期經濟下滑時有啲刺激方案，就會上返去，個思維永遠都係咁，我就唔認同嘅。條橡筋拉到咁行，始終都會斷，中國嘅債務已經拉升到GDP嘅兩至三倍，成個上行周期已經行咗十年。
彩兒：你喺呢行都做咗20年，可以喺投行呢個競爭咁激烈嘅環境生存咁耐，九七年金融風暴、○八年金融海嘯都沖你唔走，有咩秘訣先？
齋睇國策已行唔通
賴：首先一定要有獨立分析，如果分析偏頗，一、兩年間啲人唔會再睇你啲嘢，大家追求嘅都係客觀、詳細、有理據嘅分析。間唔中預測出現小錯人哋可以接受，但十次有九次錯，大方向嘅嘢都錯就要檢討吓喇。
市場好公平，你講得唔好就自然會被淘汰，好多行家嘅壽命都好短，幾年就被淘汰咗。另外，分析經濟要有世界觀、宏觀思維，理解國際關係，分析中國經濟淨係睇國策已經行唔通。
Kitty：你言論咁大膽，驚唔驚有一日會「被消失」呀？
賴：咁耐以來，我睇到人民幣咁熊，都未有強力部門畀麻煩我，真正做到獨立分析。我都驚自身安全o架，不過食得呢行飯，受人錢財，替人消災嘛，係要維護客戶利益，預咗呢個工作風險。
若有料報畀彩兒同Kitty或有嘢問，可電郵money.biz@on.cc
彩兒、Kitty