北水頭等倉：國美電器弱勢持續
A股第三次入摩落空，反跑出個巴基斯坦股市成功入摩，真係估佢唔到。之不過，筆者認為人民幣國際化進程冇得急，舊年A股人為瘋牛的結果，大家仍歷歷在目，今次入摩落空，還是聽阿爺講，用一顆平常心看待。睇兩地股市昨日先跌後回穩，可見市場反應好理智。
內地五月份新能源汽車同比產銷量增幅均逾倍，帶動相關股份做好，比亞迪（01211）昨升逾2%、天能動力（00819）更升8.3%、五龍電動車（00729）則升1.1%。
講到比亞迪，有內地報道指，旗下「唐」車系在上海有一宗起火燃燒的個案，但公司指與電池無關，故不用賠償。但講到底，新能源汽車首重安全，否則產銷不斷倍增，通街炸彈，真係是禍擋不過！
異動股方面，昨日創維（00751）績後股價急升近一成，收報5.41元，成交增至1.2億元。提到呢類股份，令筆者又想起國美電器（00493），股價正處於0.8至0.9元的低水平，見到公司頻頻大手回購股份以穩股價。
到底國美股價是否見底，仍難以下判語，特別是公司早前公布的季度業績表現遜預期，股價低迷正反映盈利前景不明朗。在缺乏利好因素刺激下，相信股價暫難擺脫低迷局面，且別因為細價好炒而對號入座。
司慕渢